16.11.2024 | 20:02
Ֆրանսիայի ռեստորաններից մեկում պատանդ վերցված 4 աշխատակիցներն ազատ են արձակվել
Եթե ապացուցվի Մանվել Գրիգորյանի մեղքը, չեմ միջնորդի մեղմացնող հանգամանքները հաշվի առնել. փաստաբան. ՏԵՍԱՆՅՈՒԹ
Հասարակություն
14.01.2019 | 13:39
Եթե դատարանում ապացուցվի Մանվել Գրիգորյանի մեղքը, ես չեմ միջնորդի դատարանին՝ հաշվի առնելու մեղմացնող հանգամանքները կամ Արցախի հերոս լինելու հանգամանքը: Հունվարի 14-ին հրավիրած ասուլիսում այս մասին հայտարարեց գեներալ Մանվել Գրիգորյանի պաշտպաններից Լևոն Բաղդասարյանը:
Փաստաբանը նշեց, որ որոշել էր այս գործով չխոսել, բայց հիմա հանդիպում է լրագրողների հետ, քանի որ օրեր առաջ մի խումբ անձինք խոչընդոտել են իր գործընկերոջ՝ Գրիգորյանի պաշտպաններից Արսեն Մկրտչյանի մասնագիտական գործունեությունը, ինչպես նաև ոստիկանների ներկայությամբ թքել նրա մեքենայի վրա:
«Թքելով իմ գործընկերոջ մեքենայի վրա՝ վերջինները թքել են իշխանության, պետության, պետականության վրա, հատկապես՝ ոստիկանների ներկայության պայմաններում: Եվ ես սա լուրջ խնդիր եմ համարում, պետականության հետ կապված խնդիր եմ տեսնում: Իրավունքն իրավաչափ շահերի հավասարակշռությունն է: Անձին դեռ չդատապարտած՝ պահանջում են բանտ ուղարկել, արդյոք սա՞ է նոր Հայաստանի որդեգրած քաղաքականությունը»,- հավելեց փաստաբանը:
Նրա համոզմամբ՝ պետք է անձին պաշտպանվելու հնարավորություն տրվի. «Եվ եթե դատարանը, այլ ոչ թե փողոցում կանգնած տասը-քսան մարդիկ կորոշեն, որ Մանվել Գրիգորյանը կատարել է իրեն մեղսագրված այդ արարքը, թող պատժվի օրենքի ողջ խստությամբ: Ինքս այդ ժամանակ, պաշտոնապես հայտարարում եմ, որպես պաշտպան՝ չեմ միջնորդելու դատարանին, որպեսզի հաշվի առնվեն մեղմացնող հանգամանքները կամ Արցախի հերոս լինելու հանգամանքը»:
Մանրամասները՝ տեսանյութում:
