16.11.2024 | 20:02
Ֆրանսիայի ռեստորաններից մեկում պատանդ վերցված 4 աշխատակիցներն ազատ են արձակվել
Ի՞նչ է պատրաստվում անել Արարատ Միրզոյանը ԱԺ նախագահի պաշտոնում․ նրա տեսլականը․ ՏԵՍԱՆՅՈՒԹ
Քաղաքականություն
14.01.2019 | 12:40
7-րդ գումարման Ազգային ժողովի նախագահի թեկնածու Արարատ Միրզոյանն այսօր խորհրդարանում իր ելույթում անդրադարձավ ԱԺ նախագահի պաշտոնում ընտրվելու պարագայում խորհրդարանական կառավարման իր տեսլականին և իր կողմից առանձնացված խնդիրներին։
«Իր կազմում ունենալով ընտրողների ավելի քան 70%-ից ավելի վստահության քվեն, խորհրդարանական օրակարգում կենտրոնական տեղ է զբաղեցնելու նոր ձևավորվելիք կառավարության ծրագիրը: Խորհրդարանը նաև պետք է դառնա ավելի նախաձեռնող, հրաժարվելով արձագանքողի տարիներ շարունակ ձևավորված իր դերից: Իմ եռանդը ներդնելու եմ նաև խորհրդարանական միասնական օրակարգ ձևավորելու գործում»,- ասաց նա։
Միրզոյանը համոզմունք հայտնեց, որ հանուն մեր պետականության, Հայաստանի ու Արցախի Հանրապետությունների հզորության, մեր ժողովրդի բարօրության, քաղաքացիների արժանապատվության, ազատության և իրավունքների գաղափարներն էին ընկած մի քանի ամիս առաջ տեղի ունեցած ժողովրդական հեղափոխության և հարյուր հազարավոր քաղաքացիների նվիրումի ու պայքարի հիմքում:
«Ի թիվս այդ քաղաքացիների, իմ համեստ ջանքերն էլ բխում էին հենց այս հավատամքից՝ քաղաքացիական և քաղաքական պայքարի մի քանի տարիների և ԱԺ ընդդիմադիր պատգամավոր եղած 1 տարվա ընթացքում: Նույնն էր և հեղափոխությունից հետո, առաջին փոխվարչապետի պաշտոնում աշխատելիս, որտեղ իմ առաջնային առաքելությունը համարում էի հնարավորն ու անհնարինը անելը, որպեսզի պետական մեքենան սահուն անցում ապրի և ավելի արդյունավետ շարունակի իր աշխատանքը հեղափոխության և Նոր Հայաստանի հռչակած կանոններով: Այժմ գործադիր իշխանությունում իմ առաքելությունն ավարտված է, և, ձեր համաձայնության դեպքում, ես պատրաստ եմ լծվել նոր մարտահրավերի հաղթահարմանը»,- ասաց Արարատ Միրզոյանը։
Մանրամասները՝ տեսանյութում։
