Ֆեյսբուք մտա ու հասկացա՝ գնել եմ «Մերսեդես», որը հետո դարձել է զրահապատ «Մայբախ»․ Արարատ Միրզոյան. ՏԵՍԱՆՅՈՒԹ

«Իմ քայլը» դաշինքով պատգամավոր ընտրված Արարատ Միրզոյանը ֆեյսբուք սոցիալական ցանցից է իմացել, որ գնել է  թանկարժեք «Մերսեդես», որը հետո դարձել է «Մայբախ» և ոչ միայն՝ նույն այդ ցանցից է տեղեկացել նաև, որ գնել է նաև դղյակ և սուզանավ։ Այս մասին այսօր Ազգային ժողովի պատգամավորների  մանդատների հանձնման արարողությունից հետո լրագրողների հետ զրույցում ասաց Միրզոյանը:

«Խոսվում է նաև մի շարք պլաստիկ վիրահատությունների, իմ՝ հոգևոր կրթություն ստանալու մասին․ հետաքրքիր էր։ Ես հոգևոր կրթություն չեմ ստացել, եթե ստացած լինեի, հպարտությամբ կնշեի։ Ես առիթ ունեցել եմ աշխատելու Անթիլիասում մեկ ամիս և մի փոքր ավել ժամանակով, կանոնակարգել եմ այնտեղի արխիվն այլ արխիվագետների հետ և մի  օր էլ Դպրեվանք այցելելու ժամանակ փորձել եմ այդ հանդերձանքը»,- ասաց Միրզոյանը։

Անդրադառնալով Ազգային ժողովի խոսնակների ընտության հարցին՝ առաջին փոխվարչապետի պաշտոնակատարը նշեց, որ հետագա շահարկումներից խուսափելու համար իրենք չպետք է գնան ընդդիմադիր խմբակցություններից որևէ մեկին նախընտրություն տալու ճանապարհով:

«Ըստ էության, այդ նախընտրությունը տվել են ընտրողները և իրենց քվեարկությամբ ձևավորել որոշակի համամասնությամբ ընդդիմադիր խմբակցություններ: Իմ մոտեցումն է չխախտել այդ համամասնությունը և չխախտել ժողովրդի քվեարկությամբ ձևավորված ուժերի հարաբերակցությունը: Եթե կա մի ընդդիմադիր խմբակցություն, որը մյուսից առավել մեծ թվով պատգամավորական մանդատներ ունի, ապա, ես կարծում եմ, որ շատ տրամաբանական է, որ հենց այդ ավելի մեծ ընդդիմադիր խմբակցությանն էլ կհասնի Ազգային ժողովի փոխնախագահի պաշտոնը»,- ասաց նա։

Մանրամասները՝ տեսանյութում։