Հավանական է, որ Ռուսաստանը կգերադասի չմտնել ավելորդ  բարդությունների մեջ և կարտահանձնի Նարեկ Գուրուրյանին․ Լարիսա Ալավերդյան․ ՏԵՍԱՆՅՈՒԹ

Ղազախստանի Կարագանդա քաղաքում կատարվածը պետք չէ  կապել քաղաքականության  և ՀԱՊԿ-ի հետ, այնտեղ նման կրիմինալ կռիվներ մշտապես էլ եղել են, որևէ նորություն դրանում չկար, սակայն այս անգամ նորություն էր այն, որ շեշտադրվեցին հայերի ազգանունները, թեև այդ վեճին մասնակցել էին հինգ-վեց ազգության  ներկայացուցիչներ․ այս մասին այսօր հրավիրված մամուլի ասուլիսի ժամանակ ասաց ՀՀ Մարդու իրավունքների նախկին պաշտպան Լարիսա Ալավերդյանը։

«Ուշադրության է արժանի այն հանգամանքը, որ կռվին մասնակից ադրբեջանցիների ազգանունները փոխարինվել են հայերի ազգանուններով, սա, թերևս, մտահոգիչ է, իսկ ինչ վերաբերում է ազգությամբ հայ Նարեկ Գուրուրյանին, ապա նա այս պահին գտնվում է ՌԴ-ում, որտեղ հանդիսանում է օտարերկրացի, քանի որ չունի այդ երկրի քաղաքացիություն։ ՌԴ-ի և Ղազախստանի միջև կա ստորագրված կոնվեցիա, որտեղ հստակեցված է, որ օտարերկրացիներին, այդ կոնվեցիայի համաձայն,  ՌԴ-ն պետք է արտահանձնի Ղազախստանին՝ բացառությամբ այն կետի, երբ կա մտահոգություն, որ անձին արտահանձնելով հնարավոր է նրա նկատմամբ սկսվի հետապնդում ազգային, ռասսայական և այլ հատկանիշներով։ Այս դեպքով կա արդյոք նման հիմք դեռ պետք է ապացուցվի։ ՌԴ-ն կարող է միայն այս կետը հիմք ընդունել և Նարեկ Գուրուրյանին չարտահանձել՝ հիմնվելով միջադեպից հետո ծավալված զարգացումների վրա»,- ասաց ՀՀ Մարդու իրավունքների նախկին պաշտպանը:

Վերջինս, սակայն, քիչ հավանական համարեց այն, որ Ռուսաստանը կարող է չարտահանձնել հայ երիտասարդին Ղազախստանին՝  հաշվի առնելով Ղազախստանի հետ ունեցած հարաբերությունները։

«Ավելի հավանական է, որ լինելով Ղազախստանի հետ բավական բարձր մակարդակի դրական հարաբերությունների մեջ, Ռուսաստանը կգերադասի չմտնել ավելորդ  բարդությունների մեջ և կարտահանձնի այդ անձին»,- ասաց նա։

Մանրամասները՝ տեսանյութում։