Նորակոչիկներին տեղափոխող ավտոբուսի վրա հարձակման գործով փնտրվող Մերուժան Ոսկանյանը ներկայացել է ՌՈ, իսկ Գոռ Հակոբյանը ձերբակալվել է

«Քիչ առաջ ՌՈ ներակայացավ նաև երեկվա միջադեպի մասնակից Մերուժան Վարուժանի Ոսկանյանը»,- ֆեյսբուքի իր էջում գրառել է ՀՀ ՊՆ խոսնակ Արծրուն Հովհաննիսյանը:

Հիշեցնենք, որ դեպի հավաքակայան երթևեկող ավտոբուսը շրջափակվել է քաղաքացիական մեքենաներով ու մի խումբ երիտասարդներ ներխուժել էին ավտոբուս՝ կռվի նպատակով: Դեպքի առթիվ երեկ հարուցվել է քրեական գործ՝ ՀՀ քրեական օրենսգրքի 258 հոդվածի հատկանիշներով (Խուլիգանություն):

Նշենք, որ  երեկ ոստիկանություն ինքնակամ ներկայացել էր նորակոչիկներից մեկի հարազատը՝ Գոռ Հակոբյանը:

Իսկ Քննչական կոմիտեի լրատվության բաժնի պետ Նաիրա Հարությունյանը ֆեյսբուքի իր էջում արված գրառամամբ տեղեկացրել է, որ  նույն գործով ոստիկանություն ինքնակամ ներկայացած Գոռ Հակոբյանը ձերբակալվել է:

«Գ.Հակոբյանը ձերբակալվել է ՀՀ քննչական կոմիտեի ԶՔԳՎ չորրորդ կայազորային քննչական բաժնի վարույթում քննվող քրեական գործով՝ 2019 թվականի հունվարի 8-ին ՀՀ ՊՆ Կոտայքի զինկոմիսարիատի Նաիրիի բաժանմունքից ՀՀ ՊՆ կենտրոնական հավաքակայան նորակոչիկներին տեղափոխող «Պազ 32053» մակնիշի ՊՆ 3299 Տ զինհամարանիշի ավտոբուսը՝ Երևան քաղաքի Շարուրի փողոցում կանգնեցնելու, մի խումբ անձանց կողմից դիտավորությամբ հասարակական կարգը կոպիտ կերպով խախտելու, հասարակության նկատմամբ բացահայտ անհարգալից վերաբերմունք դրսևորելու կասկածանքով՝ ՀՀ քրեական օրենսգրքի 258-րդ հոդվածի 3-րդ մասի 1-ին կետի հատկանիշներով 2019թ. հունվարի 9-ին՝ժամը 15:30-ին ձերբակալվել է : Կոտայքի մարզի բնակիչ 1979թ. ծնված Գ.Հակոբյանը: Միջադեպի մյուս մասնակից՝ 1996թ. ծնված Մ.Ոսկանյանը հայտնաբերվել է: Քրեական գործով նախաքննությունը շարունակվում է»,- գրելէ նա: