20.05.2026 | 12:30
Թրամփը հույս ունի «շատ արագ» ավարտել Իրանում հակամարտությունը
«Նա շատ լուրջ սխալ արեց». Էրդողանը՝ Ջոն Բոլթոնի հայտարարության մասին
Քաղաքականություն
09.01.2019 | 15:10
Թուրքիայի նախագահ Ռեջեփ Թայիփ Էրդողանը դատապարտել է ԱՄՆ նախագահի ազգային անվտանգության հարցերով խորհրդական Ջոն Բոլթոնին՝ Իսրայելում Սիրիայի քրդական ուժերի վերաբերյալ արած հայտարարության համար. փոխանցում է ermenihaber-ը:
Ամերիկացի պաշտոնյան ասել էր, թե ԱՄՆ-ն Սիրիայից իր զորքերը դուրս կբերի այն դեպքում, եթե Սիրիայում լիովին ոչնչացվի «Իսլամական պետություն» ահաբեկչական կազմակերպությունը, ինչպես նաև եթե Թուրքիան ապահովի Սիրիայի քրդական ուժերի անվտանգությունը: Իսկ Անկարան Սիրիայի քրդական ուժերին համարում է ահաբեկիչներ, այդ իսկ պատճառով Բոլթոնի այդ հայտարարությունը Թուրքիայում լուրջ դժգոհություն էր առաջացրել:
Էրդողանը, պնդելով, որ Թուրքիայի բանակը մեծ դեր է խաղացել և շարունակում է խաղալ Սիրիայում գործող ահաբեկչական կազմակերպությունների դեմ պայքարում, ասել է. «Իսրայելում Բոլթոնի արած հայտարարությունները մեզ համար անընդունելի են, մենք դա չենք կարող կուլ տալ: Բոլթոնը շատ լուրջ սխալ արեց»:
Նա նաև նշել է, որ եթե ԱՄՆ-ը Սիրիայի քրդական ուժերին որակում է որպես բարեկամ, ապա շատ մեծ սխալ է գործում: Նախագահն ավելացրել է, որ Թուրքիան այդ ահաբեկչական կազմակերպությունների դեմ պայքարում անելու է բոլոր անհրաժեշտ քայլերը՝ անկախ նրանից, թե դրա անդամները արաբներ կլինեն, թուրքեր, թե քրդեր:
