20.05.2026 | 15:31
ՄԻՊ-ը կոչ է անում բացառել խտրական և ատելություն տարածող խոսույթը քարոզարշավում
Թրամփն ուղերձ է հղել ժողովրդին. նա արտակարգ դրության ռեժիմ չի հայտարարել
Քաղաքականություն
09.01.2019 | 12:06
Դոնալդ Թրամփը Մեքսիկայի հետ սահմանին տիրող իրավիճակը ճգնաժամային է որակել, ինչպես մարդասիրական առումով, այնպես էլ անվտանգության ոլորտում: ԱՄՆ նախագահն այս մասին ասել է ժողովրդին ուղղված տեսաուղերձում, որը հրապարակվել է Սպիտակ տան կայքում, գրում է ՌԲԿ-ն:
Թրամփը հայտարարել է, որ ճգնաժամն աճում է, և իրավիճակը հնարավոր է կարգավորել միայն ԱՄՆ-ի և Մեքսիկայի միջև պատի կառուցմամբ: Նա, սակայն, արտակարգ դրության ռեժիմ չի հայտարարել:
Սպիտակ տան ղեկավարը հույս ունի, որ առաջիկայում հնարավոր կլինի համաձայնության հասնել դեմոկրատների հետ, և նրանք կհամաձայնեն շուրջ վեց միլիարդ դոլար հատկացնել պատի կառուցման համար: Այդ ժամանակ էլ, վերջապես, 2019 ֆինանսական տարվա բյուջեն կստորագրվի, և դաշնային կառավարությունը կվերականգնի աշխատանքը:
Հիշեցնենք, որ Թրամփը հրաժարվել է ստորագրել բյուջեի այն տարբերակը, որը չի նախատեսում սահմանային պատի շինարարության համար ֆինանսական միջոցների հատկացում, ինչի արդյունքում, ֆինանսավորման բացակայության պատճառով, դաշնային կառավարության մի շարք գերատեսչություններ անցյալ տարվա դեկտեմբերի 22-ից չեն աշխատում:
Դոնալդ Թրամփը պնդել է, որ Մեքսիկայից ԱՄՆ անցնելու փորձ կատարող անօրինական միգրանտների շրջանում քիչ չեն հանցագործները: Նա նաև հայտարարել է, որ եթե անհապաղ պատի շինարարությունը չսկսվի, ևս մի քանի հարյուր մարդ կզոհվի:
