10.10.2026 | 13:36
Հայտնաբերվել է զինծառայողի դի՝ հրազենային վնասվածքով․ ՊՆ
Սամվել Մայրապետյանի անձնագիրը ՀՔԾ-ն վերադարձրել է
Հասարակություն
08.01.2019 | 18:23
Հատուկ քննչական ծառայությունը վերադարձրել է գործարար Սամվել Մայրապետյանի անձնագիրը։ Այս մասին Factor.am-ի հետ զրույցում ասաց Սամվել Մայրապետյանի պաշտպան Կարեն Բատիկյանը։
«Ես գրավոր դիմել էի Հատուկ Քննչական ծառայությանը Սամվել Մայրապետյանի անձնագիրը վերադարձնելու և երկրից դուրս գալու թույլտվություն ստանալու համար։ Անձնագիրը վերադարձրել են, իսկ երկրից մեկնելու թույլտվություն չեն տրամադրել»,- ասաց Կարեն Բատիկյանը։
ՀՔԾ մամուլի խոսնակ Մարինա Օհանջանյանը մեզ հետ զրույցում նշեց, որ թեև Սամվել Մայրապետյանի անձնագիրը վերադարձվել է, սակայն նրան չի տրվել երկրից դուրս գալու թույլտվություն։
«Պաշտպանակ կողմին տեղեկացվել է, որ Սամվել Մայրապետյանը չի կարող երկիրը լքել, և ցանկացած նման փորձ կարող է հիմք դառնալ նրան կրկին կալանավորելու համար»,-ասաց Օհանջանյանը։
Հիշեցնենք, որ այս տարվա հունվարի 2-ին Սամվել Մայրապետյանի փաստաբանները դիմել էին Մարդու իրավունքների եվրոպական դատարան (ՄԻԵԴ)՝ խնդրելով որպես միջանկյալ միջոց պահանջել ՀՀ իշխանություններից վերադարձնել Սամվել Մայրապետյանի անձնագիրը, ինչպես նաև հնարավորություն տալ նրան մեկնել ՀՀ-ից՝ Գերմանիայում անհետաձգելի բուժում ստանալու նպատակով, քանի որ նրա կյանքը և առողջությունը վտանգված են:
Հունվարի 3-ին ՄԻԵԴ-ը կայացրել է միջանկյալ միջոց կիրառելու մասին որոշում և հարցեր է առաջադրել ՀՀ կառավարությանը՝ պահանջելով անհապաղ տեղեկացնել, թե որո՞նք են Սամվել Մայրապետյանի անձնագիրը ՀՔԾ-ի կողմից պահելու փաստական և իրավական հիմքերը։
