20.05.2026 | 23:00
Իսրայելը քննարկում է Ստամբուլում հյուպատոսության փակման հարցը՝ Թուրքիայի հետ լարված հարաբերությունների ֆոնին
Իվետա Տոնոյանը ԱԺ փոխխոսնակի՝ ԲՀԿ-ի թեկնածուի մասին
Քաղաքականություն
08.01.2019 | 16:34
«Բարգավաճ Հայաստան» կուսակցությունն Ազգային ժողովի փոխնախագահի պաշտոնում անպայման իր թեկնածուին կառաջադրի: Այս մասին Factor.am-ին հայտնեց խմբակցության պատգամավոր Իվետա Տոնոյանը:
«Այս պահին միակ բանը, որ կարող եմ ասել այն է՝ ԲՀԿ-ն իր թեկնածուին կառաջադրի, առաջիկայում կհրապարակենք թեկնածուի անունը»,- առանց որևէ հստակության հակիրճ ասաց Իվետա Տոնոյանը:
Պատգամավորը թեև ավելի վաղ մեզ ասել էր՝ այսօր հանդիպելու է Գագիկ Ծառուկյանին և հանդիպումից հետո մանրամասներ է հայտնելու փոխխոսնակի թեկնածության հետ կապված, սակայն նրա տրամադրած տեղեկությունն այսքանով սահմանափակվեց:
Ի դեպ, մեր տեղեկություններով Գագիկ Ծառուկյանը կուսակիցների հետ այս օրերին որևէ հանդիպում չի ունեցել, և նրանք տեղեկացված չեն, թե միանձնյա ինչ որոշում է կայացրել Ծառուկյանը:
«Իմ քայլը» դաշինքից ԱԺ փոխնախագահների պաշտոնում կառաջադրվեն Լենա Նազարյանի և Ալեն Սիմոնյանի թեկնածությունները։ «Լուսավոր Հայաստան» ընդդիմադիր խմբակցությունից փոխխոսնակի պաշտոնի համար առաջադրվել է Մանե Թանդիլյանի թեկնածությունը։
Թեև մեծամասնություն կազմող «Իմ քայլը» դաշինքը դեռ պաշտոնապես չի հայտարարել՝ ում թեկնածությունը կսատարի, այդուհանդերձ վարչապետի պաշտոնակատար Նիկոլ Փաշինյանը օրերս լրագրողների հետ զրույցում ակնարկեց, որ կողմ են՝ ԱԺ փոխխոսնակ ընտրվի ընտրողների ձայների մեծամասնությունն ստացած ուժի ներկայացուցիչ:
«Դաշինքում այդ հարցի քննարկմանը դեռ չենք հասել: Ինձ թվում է, որ պետք է սկզբունք գործի, ինստիտուցիոնալ սկզբունք: Այն խմբակցությունը, որն ավելի շատ ձայներ է ստացել ժողովրդի կողմից, նրա ներկայացուցիչն էլ պետք է փոխնախագահի պաշտոնը զբաղեցնի: Հակառակ դեպքում տրամաբանությունը չի հասկացվի», – ասել էր Փաշինյանը:
Հիշեցնենք՝ ավելի վաղ հայտնի էր դարձել, որ «Իմ քայլը» դաշինքը ԱԺ նախագահի պաշտոնում առաջարկել է առաջին փոխվարչապետի պաշտոնակատար Արարատ Միրզոյանի թեկնածությունը։
