Հասարակություն
08.01.2019 | 15:36
Ազգային ժողովի աշխատակազմի ղեկավար Արա Սաղաթելյանը պատրաստվում է աշխատանքից ազատվելու դիմում գրել: Այս մասին քիչ առաջ մեզ հետ զրույցում ասաց Արա Սաղաթելյանը:
«Չեմ շարունակելու աշխատել»,- ասաց նա:
Հարցին՝ արդեն աշխատանքից ազատվելու դիմում է գրել, Արա Սաղաթելյանը պատասխանեց, որ դեռ չի գրել, բայց պատրաստվում է: Իսկ ինչու՞ է աշխատանքից ազատվում, արդյոք նոր իշխանությունների հետ քննարկումներ են եղել, որոնց արդյունքում է նման որոշման եկել, Սաղաթելյանն ասաց. «Ես ոչինչ չեմ պատրաստվում ոչ մեկի հետ քննարկել: Սա ինձ համար աշխատակազմ է, որն ապաքաղաքական է: Ո՞ւմ հետ, ի՞նչ պետք է քննարկեմ»:
Հարցին, թե այդ դեպքում որն է աշխատանքից ազատվելու պատճառը, ԱԺ աշխատակազմի ղեկավարն ասաց. «Պատճառ չկա, ես գտնում եմ, որ իմ առաքելությունը կատարել եմ: Անպայման պետք է պատճառ ունենա՞մ»:
Նշենք, որ Արա Սաղաթելյանն ԱԺ աշխատակազմի ղեկավարի պաշտոնը զբաղեցնում է 2017 թվականից: Մինչ այս՝ 2003 թվականից, նա զբաղեցնում էր ՀՀ նախագահի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրենի պաշտոնը:
Հայկ Վարդանյան
