Դանակահարողների խմբի մեջ ազգությամբ ղազախ է եղել. Նիկոլ Փաշինյանը՝ Կարագանդայում տեղի ունեցածի մասին

Քիչ առաջ ավարտված ՔՊ նիստից հետո Նիկոլ Փաշինյանը լրագրողների հետ զրույցում անդրադառնալով Ղազախստանի Կարագանդա քաղաքում հայերի և ադրբեջանցիների միջև տեղի ունեցած մահվան ելքով բախմանը՝ նշեց, որ այդտեղ չեն կարող ազգամիջյան խնդիրներ լինել:

«Նախ ուզում եմ ցավակցություն հայտնել զոհվածի հարազատներին և ցանկանում եմ ասել, որ չկա ազգամիջյան որևէ խնդիր: Ինչքան ինձ են զեկուցել, կոնֆլիկտ ունեցած խմբերը ազգային առումով միատարր չեն եղել և դանակահարողների խմբի մեջ ազգությամբ ղազախ է եղել»,- ասաց նա:

Լրագրողները նաև հարց հնչեցրին գազի գնի մասին: Դիտարկմանը, որ սահմանին գազի գնաճը համարվում է իշխանությունների կողմից պարտություն, ՀՀ վարչապետի պաշտոնակատարն արձագանքեց. «Բելառուսի ներքաղաքական իրավիճակն ինչպիսին է, որ այնտեղ էլ թանկացավ: Մենք բանակցությունները շարունակում ենք, որ երկարաժամկետ լուծումների գանք: Մենք չենք կարող գազի գնի հարցը դիտարկել այդ կոնտեքստում: Մենք շարունակելու ենք բանակցությունները և դիրքորոշում ենք արտահայտելու՝ մեր երկրի շահերը պաշտպանելու համար: Ի՞նչ պարտության մասին է խոսքը, այդ կարծիք հայտնողները չեն ասում, թե ի՞նչ պարտության մասին է»:

Հարցին, թե երբ ինքն ասում է, որ գազը սպառողների համար չի թանկանալու, ինչ ժամկետների մասին է նշում, վարչապետի պաշտոնակատարն ասաց. «Ժամկետների մասին այս պահին ոչինչ չեմ կարող ասել»:

Իսկ արդյոք իրանական գազի ներկրումը իշխանությունների օրկարգում կա, քանի որ նախկինում միշտ այդ մասին էր բարձրաձայնում, Փաշինյանը պատասխանեց. «Նախկինում քննարկվել է, քննարկվում է և միշտ կքննարկվի, որովհետև կոնկրետ և ձեռնտու լուծում չի գտնվել»:

Հայկ Վարդանյան