19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
85 միլիոնանոց տոնածառի լույսերը միացնելու համար քաղաքապետարանը ծախսել է շուրջ 50 հազար ԱՄՆ դոլար. ՏԵՍԱՆՅՈՒԹ
Տնտեսություն
28.12.2018 | 16:29
Մինչ Հանրապետության գլխավոր տոնածառի տեսքն ու արժեքը տևական ժամանակով բուռն քննարկումների առարկա դարձան, Factor.am-ը պարզեց, որ դեկտեմբերի 21-ին տոնածառի լույսերի վառման արարողությունը ևս քաղաքային բյուջեի համար մի կլորիկ գումար է արժեցել։ Երևանի քաղաքապետարանը 150 հազար դոլարանոց գլխավոր տոնածառի լույսերի միացման միջոցառումը կազմակերպելու համար վճարել է 24 միլիոն դրամ: Սա համարժեք է 49 հազար 300 ԱՄՆ դոլարի: Այս մասին Factor.am-ը տեղեկանում է Երևանի քաղաքապետարանին ուղղված գրավոր հարցումի պատասխանից:
Ծառայությունները մատուցել է «Ֆակտորի Փրոդաքշն» ՍՊԸ-ն: 24 մլն դրամը վճարվել է Երևանի 2018 թվականի բյուջեից, քանի որ ըստ քաղաքապետարանից փոխանցված տեղեկության, այս ծառայության համար 24 մլն դրամ հատկացնելը հաստատված է եղել դեռ նախորդ քաղաքային իշխանության կողմից:
Հետաքրքիր է, որ հետհեղափոխական իշխանությունը նախորդ ղեկավարության ճոխ ծախսերը կրճատելու քայլեր չի ձեռնարկել: Ի դեպ, Հայկ Մարությանը իր երդմնակալության օրը հայտարարել էր, որ հանձնարարել է կրճատել «Էրեբունի-Երևան» տոնակատարությունների բյուջեն: Սակայն այդպես էլ թվային տվյալներ չհրապարակվեցին, թե ինչ կրճատումների մասին է խոսքը:
Անդրադառնալով «Ֆակտորի Փրոդաքշն» ՍՊԸ-ի կողմից մատուցված 24 մլն դրամի ծառայություններին՝ նշենք, որ արժեքի մեջ մտնում է հրավառությունը, շոու ծրագիրը, նկարահանումը, տեխնիկան և բեմի ձևավորումը: Ուշագրավ է նաև այն հանգամանքը, որ նման խոշոր գնում կատարելիս Երևանի քաղաքապետարանը մրցույթ չի հատարարել: Կառույցը այդ ծառայությունները ձեռք է բերել ՀՀ կառավարության 2018թ. դեկտեմբերի 13-ի հ. 1458-Ա որոշման համապատասխան`մեկ անձից գնման իրականացման ձևով:
Մինչդեռ, նշենք, որ Գնումների մասին օրենքի համաձայն, 1 մլն դրամը գերազանցող գնման դեպքում, եթե չկան հավելյալ հիմնավորումներ, ապա նախընտրելի ձև է սահմանված մրցույթը: Էլեկտրոնային ռեսգիստրի տվյալների համաձայն՝ «Ֆակտորի Փրոդաքշն» ՍՊԸ-ի հիմնադիրներն են Վազգեն Պողոսյանը և Ռուդիկ Տեր-Գալստյանը:
Ի դեպ, նոր գլխավոր տոնածառը քննարկումների ու ուշադրության կենտրոնում էր հայտնվել հենց գնի պատճառով: Տոնածառի համար Երևանի քաղաքապետարանը «Էրեբունի-Երևան» տոնակատարությունների հիմնադրամի խնայողություններից վճարել էր 85 մլն դրամ՝ ներառյալ ԱԱՀ-ն: Երևանի քաղաքապետ Հայկ Մարությանն էլ տոնածառի համար նման բարձր գին վճարելն արդարացրել էր նրանով, որ փոփոխության հասարակական պահանջ կար: Հավելենք, որ տոնածառը Հայաստան էր բերվել Պաշտպանության նախարարության ինքնաթիռով։
Լիլիթ Շաբոյան
Նարեկ Կիրակոսյան
