18.12.2025 | 16:35
Կրեմլը՝ Թուրքիայի կողմից ռուսական C-400-ները վերադարձնելու մասին
Ի՞նչ հասցրեց անել արդարադատության նախարարը․ Արտակ Զեյնալյանն ամփոփում է 6 ամիսների աշխատանքը
Հասարակություն
17.12.2018 | 12:03
Արդարադատության նախարարի պաշտոնակատար Արտակ Զեյնալյանն այսօր հրավիրված մամուլի ասուլիսի ընթացքում ամփոփեց նախարարության կողմից 2018 թ․ մայիս-նոյեմբեր ամիսներին կատարած աշխատանքները։
«Արդարադատության նախարարությունում բոլոր բարեփոխումներն իրականացվում են նորարարական մոտեցումներով, իսկ հակակոռուպցիոն և պրոբացիոն ծառայություններում իրականացվող աշխատանքների հիմքում դրվել է «քիչ ռեսուրս-մեծ մուլտիպլիկատիվ էֆեկտ» սկզբունքը։ Մեր գործունեության ընթացքում իրականացվել է վարչական համաներում, և 108 հազար անձի նկատմամբ կատարվել է համաներում՝ 1 մլն 260 հազարի շրջանակում։ Իրականացվել է նաև քրեական համաներում․ պատժի կրումից ազատ է արձակվել ավելի քան 550 դատապարտյալ, իսկ պրոբացիայի ծառայությունում համաներում է կիրառվել ավելի քան 1000 շահառուի նկատմամբ։ Երևանում և Գյումրիում նախատեսվում են հիմնել բժշկական հաստատություններ, ինչը հնարավորություն կտա ավեի շատ դատապարտյալների բարձրակարգ բժշկական ծառայություններից օգտվել։ Պատիժը պայմանական կրելու ինստիտուտն է սկսել գործարկվել այս Կառավարության օրոք, և ավելի քան 240 անձ պայմանական վաղաժամկետ ազատ է արձակվել, իսկ այս թիվը կազմում է դատարան ներկայացված միջնորդությունների 1/3-ը։ Ներկայացվել են միջնորդություններ նաև ցմահ դատապարտյալների համար, և Հայաստանի պատմության մեջ առաջին անգամ պայմանական վաղաժամկետով ազատ է արձակվել զմահ դատապարտյալ»,- ասաց Արտակ Զեյնալյանը։
Անդրադառնալով մերձավոր ազգականների հետ տեսակցություն չունեցող դատապարտյալների հարցին՝ Զեյնալյանը նշեց, որ նրանց համար ներդրվել է տեսազանգի և տեսակապի հնարավորություն, և բոլոր ՔԿՀ-ները համալրված են անհրաժեշտ տեխնիկայով։
«Կրկնապատկվել է նաև ցմահ դատապարտվածների և առանձնապես ծանր դատապարտվածների տեսակցության քանակը՝ այն հասցնելով 6-ի։ Տրվել է նաև հանձնարարական, որ երկարատև տեսակցության սենյակները պարապուրդի չմատնվեն, և եթե դատապարտյալը սպառել է իր տեսակցությունների քանակը, նրան տան լրացուցիչ տեսակցության հնարավորություն»,- նշեց Զեյնալյանը։
Խոսելով ՔԿՀ-ներում իրականացված աշխատանքների մասին՝ նախարարի պաշտոնակատարն առանձնացրեց ՄԻՊ-ի հետ համագործակցության արդյունքում դատապարտյալի տեսակցության արգելքի բացառումը, երբ չկա դրա համար անհրաժեշտ հիմնավորում։
Արտակ Զեյնալյանը խոսեց նաև ՔԿՀ-ներում իրականացվող պահպանման և վերանորոգման աշխատանքների և դրանց համար նախատեսված ֆինանսական հատկացումների մասին։
«Վերջին 10 տարիների ընթացքում առաջին անգամ ՔԿՀ-ների կապիտալ վերանորոգման համար հատկացվել է 270 մլն դրամ։ Մրցույթներն արդեն անցկացվել են, և շուրջ 100 մլն դրամ այդ 270 մլն դրամից խնայել ենք․ այն կվերադարձվի պետական բյուջե»,- ասաց նա։
Նախարարի պաշտոնակատարն անդրադարձավ նաև ներման խնդրագրերի քանակին և նշեց, որ այս պահին վարչապետի աշխատակազմ է ներկայացվել ներման խնդրագիր 200 դատապարտյալի վերաբերյալ։
Արտակ Զեյլանյանը խոսեց նաև էլեկտրոնային արդարադատության, էլեկտրոնային նոտարի ներդրման, թվային ստորագրություններն առցանց եղանակով փոխանցելու հնարավորությունների ներդրմանը, ինչը մեծացնելու է արդարադատության մատչելիությունը՝ այն դարձնելով ավելի էժան։
Աղավնի Սուքիասյան
