26.08.2026 | 20:55
Թրամփը մեկնաբանել է ԿՀՎ ղեկավարի Մոսկվա կատարած այցը
ՀՀԿ-ին հաջողվեց 0-ից ցածր վարկանիշից հասնել անհավանականին՝ 4․7 տոկոսին․ Խոսրով Հարությունյան
Քաղաքականություն
14.12.2018 | 14:10
Ազգային ժողովի արդեն նախկին պատգամավոր Խոսրով Հարությունյանի համոզմամբ՝ 2018 թվականի արտահերթ ընտրությունների ժամանակ ընտրակաշառքը, որպես կարևոր գործոն, դեր չունեցավ, իսկ խոշոր կապիտալի տերերը ուղղակիորեն մասնակցություն դրանց չունեցան, ինչի հետևանքով էլ ներկայացված չեն նոր ձևավորված խորհրդարանում։
«Հետևաբար, այս ընտրական գործընթացը, որպես հանրային կյանքի ժողովրդավարացման գործընթաց, պետք է համարել դրական, և հիմա ժամանակն է, որ հասկանանք, թե այս խորհրդարանին վերապահված սպասելիքները կարդարացվե՞ն, թե՞ ոչ․ իսկ սպասելիքները շատ են։ Այս խորհրդարանը քաղաքական որոշումներ կայացնելու առումով պետք է տարբերվի նախորդից, իսկ դա նշանակում է մասնագիտական կարողությունների ներդրում։ Այս խորհրդարանը նաև պետք է ձևավորի այնպիսի կարողություններ, որոնք ունակ են լինելու դիմագրավել արտաքին մարտահրավերներին»,- այսօր հրավիրված մամուլի ասուլիսի ժամանակ ասաց Հարությունյանը՝ շեշտելով, որ նոր խորհրդարանում կա հմտությունների և փորձառության էական պակաս։
Անդրադառնալով հարցին՝ արդյոք այս խորհրդարանը կունենա՞ ընդդիմություն՝ Խոսրով Հարությունյանը նկատեց, որ եթե անգամ ֆորմալ առումով իշխանություն չեն, ապա ընդդիմություն են, սակայն իրականում, ըստ իր համոզման, այդ ընդդիմությունը կլինի «Բարգավաճ Հայաստան» կուսակցությունը. ««Լուսավոր Հայաստանը» ևս կլինի կառուցողական ընդդիմություն, սակայն շատ սկզբունքային հարցերում չի հակադրվի «Իմ քայլը» դաշինքին»։
Խոսրով Հարությունյանն ափսոսանք հայտնեց, որ Հանրապետականը 7-րդ գումարման Ազգային ժողովում չի լինի։
«Հանուն արդարության պետք է ասել, որ այս կարճ ժամանակահատվածում կուսակցությանը հաջողվեց կրեատիվ քարոզարշավ անցկացնել և հատել 4 տոկոսի շեմը։ ՀՀԿ-ին հաջողվեց 12 օրվա ընթացքում 0-ից ցածր վարկանիշից հասնել անհավանականին՝ 4․7 տոկոսանոց վարկանիշի: Հանրապետականի առաջին դեմքերը հանրության մի հատվածի համար սպասելի են»,- նշեց Հարությունյանը։
Աղավնի Սուքիասյան
