Զապորոժիեի մարզում մարդասիրական օգնության բաշխման կետին ռուսական հարվածի հետևանքով զոհերի թիվը հասել է 29-ի

ՌԴ զինված ուժերի՝ նախօրեին Կամիշևախա բնակավայրին հասցված  հարվածի հետևանքով զոհերի թիվը հասել է 29-ի։ Այս մասին նոյեմբերի 3-ի առավոտյան հայտնել է Զապորոժիեի մարզի պաշտպանության խորհրդի համանախագահ Իվան Ֆյոդորովը։ Եվս հինգ մարդ շարունակում է մնալ բժիշկների հսկողության ներքո, գրում է The Insider-ը։

«Հակառակորդը միտումնավոր հարվածել է համայնքին՝ ՖԱԲ-3000 ավիառումբով, թիրախավորելով մարդկանց, որոնք եկել էին մարդասիրական օգնություն ստանալու»,- գրել է Ֆյոդորովը։ Նրա խոսքով՝ որոնողափրկարարական աշխատանքները շարունակվում են։ 48 մարդ համարվում է անհետ կորած։

Ուկրաինայի նախագահ Վոլոդիմիր Զելենսկին հայտարարել է. «Ռուսաստանը կրկին ու կրկին ապացուցում է, որ ատում է Ուկրաինան և այստեղ գտնվող ամեն ինչ։ Եթե Ռուսաստանն իսկապես ցանկանար լարվածության թուլացում, ապա այժմ՝ Օլեշկիից հետո, հումանիտար քայլերը շարունակելու հնարավորություն կար։ Մենք  դա առաջարկել էինք։ Սակայն Ռուսաստանը շարունակում է սպանությունները»։

Հավելենք, որ նոյեմբերի 2-ին ռուսական ավիացիան մի քանի անգամ հարվածել է Զապորոժիեի շրջանի Կամիշևախա բնակավայրը։ Թիրախավորվել է դպրոցի շենքը, որն օգտագործվում էր որպես տեղի բնակիչներին մարդասիրական օգնություն տրամադրելու կետ։ Ավանի ուղղությամբ նետվել է առնվազն 10 ավիառումբ, այդ թվում՝ անմիջապես այն ապաստարանի վրա, որտեղ թաքնվել էին մարդիկ։

Ուկրաինայի արտակարգ իրավիճակների պետական ծառայության տվյալներով՝ զոհվածների թվում են երկու փրկարար և չորս ոստիկան։

Միաժամանակ,այս առնչությամբ, Լատվիան հրավիրել է ՄԱԿ-ի Անվտանգության խորհրդի արտահերթ նիստ։

«Լատվիան ՄԱԿ-ի Անվտանգության խորհրդի արտահերթ նիստ է հրավիրել՝ Ուկրաինայում խաղաղ բնակիչների դեմ Ռուսաստանի իրականացրած սարսափելի հարձակումներից հետո, այդ թվում՝ Կամիշեվախայում գտնվող օգնության բաշխման կենտրոնի վրա հարձակումից հետո, որի հետևանքով զոհվել է առնվազն 26 անմեղ մարդ»,-X-ի իր միկրոբլոգում հայտնել է Լատվիայի ԱԳ նախարար Բայբա Բրաժեն։

Թարգմանությունը՝ Էմմա Չոբանյանի