Հասարակություն
22.10.2026 | 16:22Հակակոռուպցիոն դատարանում քննվում է Ռոբերտ և Սեդրակ Քոչարյանների նկատմամբ երկամսյա ապօրինի կալանքը երկարաձգելու միջնորդությունը։
Սեդրակ Քոչարյանի գործով դատավորն Արամ Գրիգորյանն է, իսկ Ռոբերտ Քոչարյանի կալանքի երկարացման հարցը քննում է դատավոր Վարդգես Ստեփանյանը։
Նշենք, որ հայր և որդի Քոչարյանները ձերբակալվել, ապա կալանավորվել էին օգոստոսի 25-ին՝ այն բանից հետո, երբ Հակակոռուպցիոն կոմիտեն խուզարկություններ էր իրականացրել Քոչարյանների ընտանիքին պատկանող մի շարք տարածքներում։
Հակակոռուպցիոն կոմիտեի տարածած տեղեկատվության համաձայն՝ ձեռք են բերվել տվյալներ, որ Ռոբերտ Քոչարյանը նախագահ եղած ժամանակ՝ 1998–2008 թվականներին, իրեն մերձավոր անձանց հետ նախնական համաձայնությամբ և պաշտոնեական դիրքն օգտագործելով՝ պետական սեփականությունից օտարել է հանրային նշանակության արժեքավոր գույքեր՝ դրանք ձեռք բերելով շուկայական արժեքից զգալիորեն ցածր գներով։
Քննության վարկածով՝ գործարքներն իրականացվել են կեղծ հիմնավորումներով, իսկ գույքերի իրական սեփականատերերին թաքցնելու նպատակով դրանցից մի մասը ձևակերպվել է հարազատների անուններով։ Քննվում են նաև այդ գործարքներից ստացված միջոցների հնարավոր ապօրինի ծագումն ու օրինականացման հանգամանքները։
Ինչ վերաբերում է Սեդրակ Քոչարյանին, ապա, ըստ գործի, նա առնչություն է ունեցել վիճահարույց գործարքներին։ Նրան վերագրվում է փողերի լվացում և հանցագործությունների կատարմանն օժանդակելու մեղադրանքներ։
