15.10.2026 | 12:00
ՀԷՑ-ը դառնում է պետական, կառավարման ենք հանձնելու թոփ ընկերության, չենք մասնավորեցնելու. Փաշինյան․ ՏԵՍԱՆՅՈՒԹ
15 ամիս՝ առանց ՊՎԾ մշտական ղեկավարի․ ինչու է հապաղում Փաշինյանը
15.10.2026 | 10:30
Պետական վերահսկողական ծառայության ղեկավարի պաշտոնը թափուր է արդեն 15 ամիս՝ Ռոմանոս Պետրոսյանի՝ Հայաստանի էլեկտրական ցանցերի ժամանակավոր կառավարիչ նշանակվելուց ի վեր։
ՊՎԾ-ն, հիշեցնենք, ՀՀ վարչապետի ենթակայությամբ գործող մարմին է։
Factor.am-ը գրավոր հարցմամբ դիմել էր վարչապետ Նիկոլ Փաշինյանին՝ պարզելու, թե ինչո՞ւ մինչ օրս ՊՎԾ-ի ղեկավար չի նշանակվել, արդյո՞ք վարչապետը փնտրում է նոր ղեկավար և չի՞ գտնում արժանի թեկնածու, թե՞ այդ հաստիքը պահվում է Ռոմանոս Պետրոսյանի համար։
Կառավարությունից պատասխանել են, որ Ռոմանոս Պետրոսյանին ՊՎԾ-ի ղեկավարի պաշտոնից ազատելու որոշման 2-րդ կետի համաձայն՝ Պետական վերահսկողական ծառայության ղեկավարի պարտականությունների կատարումը ժամանակավորապես վերապահվել է պետական վերահսկողական ծառայության ղեկավարի տեղակալ Ռոբերտ Բազիկյանին։
«Վերոնշյալով պայմանավորված՝ Պետական վերահսկողական ծառայությունը շարունակում է իր բնականոն և արդյունավետ գործունեությունը։ ՊՎԾ ղեկավարի պաշտոնում նշանակումը կիրականացվի անհրաժեշտությունից ելնելով՝ վարչապետի օրենքով սահմանված հայեցողական լիազորությունների շրջանակում»,- նշված է կառավարության պատասխանում։
Այսպիսով՝ կառավարությունը չի հստակեցրել, թե ինչու է ՊՎԾ ղեկավարի պաշտոնը շուրջ 15 ամիս թափուր մնում, և արդյոք առաջիկայում նոր ղեկավար նշանակելու մտադրություն կա։
Նկատենք, որ կառավարությունը սկսել է ՀԷՑ-ի 100% բաժնետոմսերի նկատմամբ հանրության գերակա շահ ճանաչելու մասին գործընթացը, կառավարության որոշման նախագիծը քննարկման փուլում է։ ՀԷՑ-ի շուրջ գործընթացի ավարտի ժամկետը հայտնի չէ։
Կարելի է ենթադրել, որ Ռոմանոս Պետրոսյանը կշարունակի ընկերության ժամանակավոր կառավարչի պաշտոնավարումը, մինչ խնդիրը լուծվի, իսկ ՊՎԾ-ն այս ընթացքում կշարունակի գործել ժամանակավոր պաշտոնակատարի ղեկավարությամբ։
Գայանե Խաչատրյան
