Հասարակություն
01.10.2026 | 17:55
Ադրբեջանցու կրակոցից վիրավորված ՀՀ քաղաքացին Սիսիանի ԲԿ-ում է։ Տնօրեն Անիկ Գրիգորյանը Factor.am-ին հայտնեց, որ նրա կյանքին վտանգ չի սպառնում։
«Կայուն վիճակ է, կյանքին վտանգ չի սպառնում, գտնվում է հետազոտման փուլում»,- ասաց տնօրենը։
Հիշեցնենք, որ ԱԱԾ-ն քիչ առաջ հայտնեց, որ սեպտեմբերի 29-ին ադրբեջանական կողմը հայկական կողմին տեղեկացրել է, որ իր զորամասերից մեկի զինծառայողն անհայտ հանգամանքներում լքել է ծառայության վայրը՝ չբացառելով, որ նա կարող է ապօրինի հատել Հայաստանի Հանրապետության սահմանը։
Դրանից հետո Հայաստանի և Ադրբեջանի իրավասու մարմիններն իրականացրել են համապատասխան որոնողական աշխատանքներ։
Հոկտեմբերի 1-ին՝ ժամը 14։15-ին, ՀՀ ՆԳՆ 112 օպերատիվ կառավարման կենտրոն ահազանգ է ստացվել, որ Սյունիքի մարզի Շաքի բնակավայրում կրակել են ՀՀ քաղաքացու ոտքին։
Դեպքի վայր են մեկնել ՆԳՆ ոստիկանության տարբեր ստորաբաժանումների օպերատիվ խմբեր։ Ձեռնարկվել են անհետաձգելի միջոցառումներ՝ դեպքի բոլոր հանգամանքները պարզելու ուղղությամբ։
Պարզվել է, որ հանցագործությունը կատարել է ադրբեջանցի զինծառայողը, որը ձերբակալվել է։
Դեպքի մանրամասները ներկայացվել են նաև ադրբեջանական կողմին։
ՀՀ Քննչական կոմիտեում դեպքի առնչությամբ նախաձեռնվել է քրեական վարույթ։ Թե որ հոդվածով՝ հայտնի չէ։
Արփի Հակոբյան
