Հունգարիայի խորհրդարանը վարչապետին զրկել է անձեռնմխելիությունից

Սեպտեմբերի 28-ին Հունգարիայի խորհրդարանը քվեարկել է վարչապետ Պետեր Մագյարի անձեռնմխելիությունը կասեցնելու օգտին։ Index-ի տվյալներով՝ կառավարության ղեկավարը այժմ կարող է հարցաքննվել և նույնիսկ ձերբակալվել, փոխանցում է The Insider-ը։

Մագյարի նկատմամբ հետաքննություն է ընթանում 2024 թվականին տեղի ունեցած միջադեպի կապակցությամբ՝ կապված գողության հետ, երբ նա Եվրախորհրդարանի անդամ էր: Քննության տվյալներով՝ Մագյարը գիշերային ակումբում իրեն նկարահանող տղամարդուց հեռախոսը խլել է և նետել Դանուբ գետը։ Այդ ժամանակ Եվրախորհրդարանը հրաժարվել էր չեղարկել Մագյարի անձեռնմխելիությունը:

Այն բանից հետո, երբ 2026 թվականին Եվրոպական խորհրդարանում քաղաքական գործչի լիազորությունների ժամկետն ավարտվել է, հետաքննությունը շարունակվել է, սակայն Մագյարը կրկին անձեռնմխելիություն է ստացել։ Նրա գլխավորած «Տիսա» կուսակցությունն ապրիլին հաղթել է Հունգարիայի խորհրդարանական ընտրություններում, որից կարճ ժամանակ անց նա դարձել է երկրի վարչապետ։

Սեպտեմբերի 22-ին գլխավոր դատախազի պաշտոնակատար Իշտվան Լայտարը նախաձեռնել է նրան անձեռնմխելիությունից զրկելու ընթացակարգ, որպեսզի հնարավոր լինի հարցաքննել։

Ըստ Index-ի՝ վարչապետը «Տիսա» կուսակցության իր համախոհներին խնդրել է աջակցել դատախազության խնդրանքին։

Սեպտեմբերի 28-ին կայացած քվեարկության ընթացքում Հունգարիայի խորհրդարանն անձեռնմխելիությունից զրկել է նաև պատգամավորներ Բալաժ Հանկոյին («Ֆիդես») և Միկլոշ Շեստակին (Քրիստոնեադեմոկրատական ժողովրդական կուսակցություն, KDNP)։

Հանկոյին, որը Վիկտոր Օրբանի կառավարությունում մշակույթի նախարար էր, կասկածում են դրամաշնորհների ոչ նպատակային օգտագործման մեջ։ Ենթադրվում է, որ մշակույթի ոլորտին հատկացված միջոցները, մասնավորապես, ուղղվել են նախընտրական քարոզարշավների ֆինանսավորմանը։ Զարգացման հարցերով նախկին նախարար Շեստակին փորձում են զրկել անձեռնմխելիությունից՝ կաշառք ստանալու և այլ հանցագործությունների վերաբերյալ գործի շրջանակում։

Թարգմանությունը՝ Էմմա Չոբանյանի