Մինսկի փողոցի ջրամատակարարման համակարգը պետությանը կփոխանցվի և վարձակալության կհանձնվի «Վեոլիա ջուր» ընկերությանը

Երևանի Նոր Նորք վարչական շրջանում՝ Մինսկի փողոցի 49/1 հասցեում գտնվող ջրամատակարարման և ջրահեռացման համակարգը նախատեսվում է նվիրատվության կարգով ընդունել պետական սեփականություն։ Հարցն ընդգրկված է Կառավարության սեպտեմբերի 11-ի նիստի օրակարգում։

Կառավարության որոշման նախագծի համաձայն՝ գույքը ներկայում պատկանում է «ԱՌՄԱ ՔՈՆՍԹՐԱՔՇՆ» ՍՊԸ-ին։ Նվիրատվությունից հետո այն կամրացվի ՀՀ տարածքային կառավարման և ենթակառուցվածքների նախարարության Ջրային կոմիտեին, ապա վարձակալության կհանձնվի «Վեոլիա Ջուր» ՓԲԸ-ին։

Նվիրաբերվող համակարգերի ընդհանուր շուկայական արժեքը կազմում է մոտ 14.9 միլիոն դրամ։ Դրանց թվում են տարբեր տրամաչափի ջրագծեր և կոյուղագծեր՝ ավելի քան 695 մետր ընդհանուր երկարությամբ։

Ջրային կոմիտեն նախագիծը հիմնավորում է գույքի պատշաճ տնօրինման և հաշվառման, ինչպես նաև ջրամատակարարման ու ջրահեռացման ծառայությունների որակի բարելավման անհրաժեշտությամբ։

Քանի որ խմելու ջրի մատակարարման և ջրահեռացման ծառայությունների մատուցման լիցենզիա ունի «Վեոլիա Ջուր»-ը, համակարգի շահագործումը, պահպանումն ու ընդլայնումը նախատեսվում է իրականացնել ընկերության կողմից։

Նախագծով սահմանվում է, որ որոշումն ուժի մեջ մտնելուց հետո մեկ ամսվա ընթացքում Ջրային կոմիտեն և «ԱՌՄԱ ՔՈՆՍԹՐԱՔՇՆ»-ը պետք է կնքեն նվիրատվության պայմանագիր։ Գույքը Ջրային կոմիտեին ամրացնելուց հետո՝ եռամսյա ժամկետում, այն վարձակալության կհանձնվի «Վեոլիա Ջուր»-ին՝ 2016 թվականի նոյեմբերի 21-ին կնքված վարձակալության պայմանագրի շրջանակում։

Փաստաթղթի համաձայն՝ գործարքի հետևանքով պետական կամ համայնքային բյուջեների ծախսերում կամ եկամուտներում փոփոխություն չի նախատեսվում։

Արփի Հակոբյան