Վերոնիկա Զոնաբենդը հանդիպել է Կառավարության անդամների հետ. Սիրանուշ Սահակյան․ ՏԵՍԱՆՅՈՒԹ

Արցախի նախկին պետնախարար Ռուբեն Վարդանյանի կնոջ՝ Վերոնիկա Զոնաբենդի նախաձեռնության շրջանակներում հանդիպում է տեղի ունեցել ՀՀ արտաքին գործերի և միջազգային առևտրի նախարարության (ոչ քաղաքական մակարդակով) և Գերիների ու անհայտ կորած անձանց հարցերով զբաղվող միջգերատեսչական հանձնաժողովի ներկայացուցիչների հետ։ Այս մասին մամուլի ասուլիսի ժամանակ հայտնեց ՄԻԵԴ-ում հայ ռազմագերիների շահերի պաշտպան, իրավապաշտպան Սիրանուշ Սահակյանը։ Ըստ Սահակյանի՝ քննարկվել են մարդասիրական բնույթի երկու կարևոր հարցադրումներ։

«Մեկը՝ Կարմիր խաչի գործունեության դադարի պայմաններում այցելությունների հնարավորությունների ստեղծումը՝ երրորդ երկրի միջոցով Հայաստանի կողմից հյուպատոսական ծառայություններ մատուցելը Բաքվում գտնվող մեր հայրենակիցներին:

Եվ երկրորդը՝ մարդասիրական նախաձեռնությունների իրականացումը: Եթե այլ մարդասիրական նախաձեռնություններն էլ իրականանան, մենք պատրաստ ենք աջակցել, սակայն այս պահին հանդես ենք եկել կոնկրետ առաջարկով․ տիկին Զոնաբենդը ցանկանում է իրավապաշտպան կանանց խումբ տանել Ադրբեջանի Հանրապետություն և նաև Ադրբեջանի մարդու իրավունքների պաշտպանի հովանու ներքո կարողանալ մուտք գործել այն փակ հաստատություն, որտեղ պահվում են հայերը, և նրանց փոխանցել անձնական իրեր, լուսանկարներ, նամակներ, ապահովել այն իրավունքի իրացումը, որից նրանք տևական ժամանակ զրկված են»,- ասաց իրավապաշտպանը։

Սիրանուշ Սահակյանն ընդգծեց, որ նման նախաձեռնությունը չի կարող մնալ մասնավոր մակարդակում, քանի որ այն պահանջում է պետական աջակցություն և համաձայնեցում․ խնդիրը վերաբերում է մուտքի վիզաների տրամադրմանը, անվտանգության երաշխիքներին և քրեակատարողական հիմնարկ մուտք գործելու իրավական թույլտվություններին։

«Մենք խնդրել ենք, որպեսզի Հայաստանի Հանրապետությունը հստակ դիրքորոշում արտահայտի, թե արդյոք նման նախաձեռնությունը կարող է արժանանալ պետական աջակցության։ Պաշտոնական պատասխան դեռ չունենք, հարցը քննարկման փուլում է, և ակնկալում ենք, որ սեղմ ժամկետներում պետական դիրքորոշում կձևավորվի»,- նշեց ՄԻԵԴ-ում հայ ռազմագերիների շահերի պաշտպանը։

Մանրամասները՝ տեսանյութում։

Արփի Հակոբյան