Անհետ կորածների հարազատները համահայկական ասոցիացիա են ստեղծել

Անհետ կորածների հարազատները ստեղծել են «Անհայտ կորած անձանց հարազատների համահայկական ասոցիացիա»՝ նպատակ ունենալով խթանել անհետ կորածների ճակատագրերի պարզաբանման գործընթացը և պաշտպանել նրանց ընտանիքների իրավունքները։

2020 թվականից անհետ կորած Հենրի Մուրադյանի հորեղբայր, ասոցիացիայի համահիմնադիր նախագահ Գոռ Մուրադյանի խոսքով՝ կառույցում ընդգրկված են 1990-ականների, 2020 և 2023 թվականների անհետ կորածների հարազատներ։ Նրա խոսքով՝ գաղափարը ձևավորվել է 2020 թվականի պատերազմից հետո՝ տարիների ընթացքում անհետ կորածների ընտանիքների պայքարը մեկ հարթակում համախմբելու նպատակով։

Կազմակերպությունը նախատեսում է համագործակցել պետական և միջազգային կառույցների, հասարակական կազմակերպությունների, դոնորների ու հետազոտական կենտրոնների հետ։

Գոռ Մուրադյանը նաև հայտնել է, որ ինքը ԱԱԾ-ի կողմից ստեղծված անհայտ կորածների հարցերով հանձնաժողովի անդամ է։ Նրա խոսքով՝ նախորդ շրջանում հանձնաժողովի աշխատանքում որոշակի առաջընթաց արձանագրվել է, այդ թվում՝ տուժողի կարգավիճակ չունեցող անձանց վերաբերյալ քննություններ նշանակելու ուղղությամբ։

«Նիստերի շրջանակում՝ Աբազյանի ժամանակվանից սկսած, որոշակի հաջողություններ գրանցել ենք, ընդհուպ մինչև տուժողի կարգավիճակ չունեցողների վերաբերյալ քննություն նշանակելը: Աբազյանի փոխվելուց հետո երկու նիստ է եղել, բայց կոնկրետ փոփոխություն չկա։ Միակ փոփոխությունը, որ հանձնաժողովները իրար հետ համագործակցում են ու, ոնց որ, հույս է առաջացել, որ ինչ-որ մի փուլում կարող է գան համաձայնության և վերսկսել որոնողական, նույնականացման աշխատանքները»,- ասաց նա։

Միաժամանակ, Մուրադյանը նշեց, որ գործընթացների ժամկետների մասին այս պահին որևէ հստակ բան ասել հնարավոր չէ, քանի որ բանակցությունների մի մասը գաղտնի է։

Նորաստեղծ սոցիացիան արդեն սկսել է միջազգային կառույցների հետ աշխատանքը՝ մասնավորապես ՄԱԿ-ի Բռնի անհետացումների կոմիտե է ուղարկվել զեկույց։

Միևնույն ժամանակ, Գոռ Մուրադյանը չբացառեց ավելի կոշտ գործողությունների հնարավորությունը, եթե համագործակցության ճանապարհը արդյունք չտա։

Արփի Հակոբյան