Firebird-ի և OpenAI-ի հետ համագործակցությամբ կրթությանը հասանելի կդառնա 50 հազար բաժանորդագրություն․ ՏԵՍԱՆՅՈՒԹ

Հայաստանի բարձրագույն և հանրակրթական համակարգերում սեպտեմբերից մեծ ծավալով հասանելի կդառնան արհեստական բանականության (ԱԲ) կրթական գործիքները: Այս մասին նոր ուսումնական տարվան ընդառաջ հրավիրված ասուլիսում հայտարարել է ՀՀ ԿԳՄՍ նախարար Ժաննա Անդրեասյանը:

«Firebird-ի և OpenAI-ի հետ համագործակցության արդյունքում համակարգին կտրամադրվի 50 հազար բաժանորդագրություն: Ծրագրից կօգտվեն բուհական համակարգը, իսկ հանրակրթության ոլորտում՝ բացառապես ավագ դասարանների աշակերտներն ու մանկավարժները»,- ասաց Անդրասյանը:

Նախարարի խոսքով՝ խոսքը ոչ թե սովորական ChatGPT-ի, այլ հատուկ կրթության համար նախատեսված ChatGPT Edu գործիքակազմի մասին է.

Նշվեց, որ էլեկտրոնային մատյանի տվյալների (գնահատականներ, բացակայություններ) հիման վրա ԱԲ գործիքները թույլ կտան իրականացնել խորքային վերլուծություններ, վեր հանել առավել խոցելի ուղղությունները և ճիշտ պլանավորել դպրոցի աշխատանքը:

Ըստ Անդրեասյանի՝ համակարգը կազատի մեխանիկական ծանրաբեռնվածությունից՝ աջակցելով թեստերի, առաջադրանքների կազմմանն ու թեմատիկ պլանավորմանը, ինչը թույլ կտա կենտրոնանալ ստեղծագործական աշխատանքի վրա:

Ժաննա Անդրեասյանը շեշտել է, որ ուսուցիչների ու տնօրենների համար կտրամադրվեն հատուկ ուղեցույցներ և տեսանյութեր, կանցկացվեն լայնածավալ վերապատրաստումներ:

«Կրթական համակարգը պետք է սովորի առնչվել արհեստական բանականության հետ. դա մի իրողություն է, որն այլևս մեր կյանքի մասն է: Միայն գրագետ և մտածված լուծումներով կարող ենք այդ գործիքակազմը ծառայեցնել հօգուտ որակյալ կրթության, այլ ոչ թե դրանով նոր մարտահրավերներ ստեղծել»,- նշեց նախարարը:

Մանրամասները՝ տեսանյութում։
Անի Թամրազյան