Գալուզինը նշել է, թե երբ կարող է քննարկվել ՀԱՊԿ-ում Հայաստանի ձայնի իրավունքի հարցը

Հավաքական անվտանգության կազմակերպությունում (ՀԱՊԿ) Հայաստանին ձայնի իրավունքից զրկելու հարցը կարող է քննարկվել կազմակերպության նոյեմբերի 11-ի գագաթնաժողովում, ՏԱՍՍ-ին տված հարցազրույցում հայտարարել է Ռուսաստանի փոխարտգործնախարար Միխայիլ Գալուզինը։

«Կազմակերպության անդամներից մեկի նկատմամբ սահմանափակող միջոցների հնարավոր ընդունման վերաբերյալ ցանկացած որոշում Հավաքական անվտանգության խորհրդի (որը ներառում է ՀԱՊԿ անդամ պետությունների ղեկավարներին) իրավասությունների շրջանակում է, որն իրավունք ունի նման որոշումներ կայացնել կազմակերպության կանոնադրության դրույթների հիման վրա (համապատասխան դրույթներ են պարունակում, մասնավորապես, 20-րդ և 25-րդ հոդվածները)»,- ասել է Գալուզինը՝ պատասխանելով պարտավորությունների չկատարման վերաբերյալ կանոնադրության համապատասխան հոդվածը կիրառելու վերաբերյալ հարցին։

Նա հավելել է, որ Խորհրդի հաջորդ նիստը նախանշված է նոյեմբերի 11-ին Մոսկվայում։

Գալուզինի խոսքով՝ ՀԱՊԿ կանոնադրությունը միջազգային պայմանագիր է և պետք է բարեխղճորեն կատարվի բոլոր կողմերի կողմից, ներառյալ՝ յուրաքանչյուր անդամ պետության պարտավորությունը՝ ֆինանսավորել ՀԱՊԿ մարմինների գործունեությունը։

«Երևանի կողմից կազմակերպության աշխատանքներին մասնակցելուց հրաժարվելը և տարեկան բյուջեի վերաբերյալ որոշումները չստորագրելը պարզապես նշանակում է նրա իրավունքների իրացման անկարողություն, բայց չի դադարեցնում Հայաստանի պարտավորությունները՝ ժամանակին կատարել իր վճարումները։ Հիմնվելով ինստիտուցիոնալ արդյունավետության պահպանման սկզբունքի վրա՝ ցանկացած միջազգային կազմակերպություն ունի այս իրավիճակի համար ընթացակարգեր, ինչպես նշված է իր հիմնադիր փաստաթղթերում։ ՀԱՊԿ-ն բացառություն չէ»,- ասել է Ռուսաստանի փոխարտգործնախարարը։