Հեռացվել է «Մուլտի Վելնես» անվանումը, քաղաքապետարանի դրոշն է բարձրացվել․ ՏԵՍԱՆՅՈՒԹ

Այսօրվանից վերաբացվել է նախկին «Մուլտի Ուելնես» (Multi Wellness) մարզաառողջարանային համալիրը։ Բոլոր նրանք, ովքեր ունեին փաթեթներ, այդ բոլոր փաթեթները շարունակում են գործել․ այս մասին այսօր առավոտյան հայտարարել է Երևանի քաղաքապետ Տիգրան Ավինյանը։

«Բոլոր այն օրերի համար, որոնց ընթացքում համալիրը փակված է եղել, այդ օրերը կավելացվեն ձեր փաթեթներին, և բոլոր այն ծառայությունները, որոնք որ դուք գնել եք նախկինում, դրանք շարունակվելու են ձեզ մատուցվել։ Երևանի քաղաքապետարանը ապահովելու է համալիրի բնականոն աշխատանքը, հետևապես՝ արդեն իսկ կարող եք վերադառնալ մարզվելուն»,- նշել է նա։

Factor TV-ն առավոտյան այցելել է տարածք ու արձանագրել, որ «Մուլտի Ուելնես» ցուցանակը հեռացվել է շինության վրայից, բացի դրանից՝ շենքի վրա քաղաքապետարանի դրոշն է ծածանվում։

Հիշեցնենք՝ հուլիսի 16-ին Ավինյանը հայտարարել էր, որ գործարար, «Բարգավաճ Հայաստան» կուսակցության նախագահ Գագիկ Ծառուկյանին պատկանող մարզասրահի շենքն անցել է Երևանի քաղաքապետարանի տնօրինության տակ։

«Այդ շինությունը կառուցված է եղել համայնքային տարածքի, անօտարելի հողի վրա, կառուցված եղել է խախտումներով, և պայմանագրի համաձայն՝ կողմերից մեկը, այսինքն՝ Երևանի քաղաքապետարանը, խզել է պայմանագիրը և շենքն ամբողջությամբ անցել է Երևանի քաղաքապետարանին»,- Factor TV-ին տված հարցազրույցում ասել էր նա։

Հ․Գ․ Քիչ առաջ Երևանի քաղաքապետարանը վերագրյալի առնչությամբ հայտարարություն է տարածել, որ ներակայացնում են ստորև․

Մանրամասները՝ տեսանյութում։

Եվգենյա Համբարձումյան