Բաքվի վերաքննիչ դատարանում հայ գերիների գործով նիստում ելույթ են ունեցել դատախազները

Բաքվի վերաքննիչ դատարանում հուլիսի 21-ին շարունակվել են Արցախի ռազմաքաղաքական ղեկավարների շինծու գործերով դատավճիռների դեմ ներկայացված բողոքների քննությունը։ Ադրբեջանական լրատվամիջոցների հաղորդմամբ՝ նիստը նախագահող դատավոր Էլմար Ռահիմովը նշել է, որ հայ գերիների հետ առանձին հանդիպման վերաբերյալ պաշտպանության կողմի միջնորդությունը քննարկվել է դատավորների կազմի կողմից, և որ հարցը լուծվել է։

Նշվել է նաև, որ պաշտպանությունը և տուժողների ներկայացուցիչներն արդեն հանդես են եկել ելույթներով։ Գործող դատավարական կարգի համաձայն՝ խոսքը տրվել է պետական ​​մեղադրողին։

Պետական ​​մեղադրողներ Աբբաս Աբբասլին, Անար Ալեքբերովը և Սևինջ Գասիմովան նշել են, թե «քրեական գործի բոլոր ապացույցները քննվել են համապարփակ, ամբողջական և օբյեկտիվորեն առաջին ատյանի դատարանում»։ Դատախազների պնդմամբ՝ գործի նյութերում արտացոլված հանգամանքները, իբր, «հաստատվել են տուժողների և վկաների ցուցմունքներով, դատաբժշկական փորձաքննության եզրակացություններով, իրեղեն ապացույցներով, փաստաթղթերով, դեպքի վայրի զննության եզրակացություններով և քրեական գործով հավաքված այլ ապացույցներով»։

Նշվել է, թե դատավարության ընթացքում ներկայացված ապացույցների ամբողջությունը, իբր, հաստատում է հայ գերիներին առաջադրված մեղադրանքների հիմնավորվածությունը և ցույց է տալիս, թե «առաջին ատյանի  դատարանի եզրակացությունները համապատասխանում են քրեական գործով հետազոտված ապացույցներին»։

Հաջորդ դատական ​​նիստը տեղի կունենա հուլիսի 24-ին։

Թարգմանությունը՝ Էմմա Չոբանյանի