Բաքվի վերաքննիչ դատարանում ավարտվել են հայ գերիների ելույթները

Բաքվի վերաքննիչ դատարանում հուլիսի 17-ին  շարունակվել է  Արցախի ռազմաքաղաքական ղեկավարների շինծու գործերով դատավճիռների դեմ ներկայացված բողոքների քննությունը։

Դատական նիստին, որն անցկացվել է Վերաքննիչ դատարանի դատավոր Էլմար Ռահիմովի նախագահությամբ ու դատավորներ Էմին Մեհդիևի և Մեհրիբան Գարաևայի  մասնակցությամբ, մասնակցել են նաև հայ գերիների պաշտպանները, թարգմանիչները, այսպես կոչված, «տուժողների» ներկայացուցիչները, պետական ​​մեղադրողներ Աբբաս Աբբասլին, Անար Ալեքբերովը և Սևինջ Գասիմովան։

Սկզբում  ելույթ է ունեցել Մադաթ Բաբայանի պաշտպանը։ Նա դատարանին խնդրել է  չեղյալ համարել 2026 թվականի փետրվարի 5-ի դատավճիռը և արդարացման դատավճիռ կայացնել  Բաբայանի նկատմամբ, որի իրավունքները նա պաշտպանում էր։

Հետո ելույթ ունեցող  Բաբայանը ասել է,որ  համաձայն է իր պաշտպանի դիրքորոշման հետ և իրեն մեղավոր չի համարում։

Այնուհետև  ելույթ է ունեցել   Արայիկ Հարությունյանի պաշտպանը։ Նա  ներկայացրել է  դատարանին վերաքննիչ բողոքի շրջանակներում փաստարկները։

Դրանից հետո  ելույթ են ունեցել տուժողների ներկայացուցիչներ՝ Շաիգ Հուսեյնովը, Արզու Ջավադովը, Ալի Ախմեդովը և Էլմիրա Իսմայիլովան ու նշել, թե  Բաքվի ռազմական դատարանի 2026 թվականի փետրվարի 5-ի վճիռը օրինական է և արդարացված, իսկ  առաջադրված մեղադրանքները լիովին հիմնավորված։ Նրանք դատարանին խնդրել են  անփոփոխ թողնել վճիռը։

Սրանով ավարտվել են  հայ գերիների, նրանց պաշտպանների և տուժողների ներկայացուցիչների ելույթները: Այնուհետև, դատական ​​նիստում պաշտպանության կողմը, այդ թվում՝ Դավիթ Իշխանյանը, Լևոն Մնացականյանը և Դավիթ Մանուկյանը, ներկայացրել են  իրենց միջնորդությունները:

Դատախազ  Աբբասլին արտահայտել է  իր դիրքորոշումը ներկայացված միջնորդությունների վերաբերյալ։ Դատական ​​նիստի ընթացքում հայտարարվել է  ընդմիջում՝ դրանք քննարկելու համար։ Ընդմիջումից հետո  հրապարակվել են  որոշումները, որի համաձայն՝ միջնորդությունները մասամբ բավարարվել են։

Հաջորդ դատական ​​նիստը կկայանա հուլիսի 21-ին։

Թարգմանությունը՝ Էմմա Չոբանյանի