05.09.2026 | 19:58
Քննարկվել են Հայաստանի և Իրաքյան Քուրդիստանի միջև տնտեսական կապերի զարգացման հնարավորությունները
Հայաստանը COP17-ի հարթակը դիտարկում է միջազգային համագործակցությունն ամրապնդելու հնարավորություն
Քաղաքականություն
15.07.2026 | 22:00
ՀՀ ԱԳ նախարարի տեղակալ Ռոբերտ Աբիսողոմոնյանը Նյու Յորքում անցկացվող Կայուն զարգացման հարցերով բարձր մակարդակի քաղաքական ֆորումի շրջանակում հանդես է եկել ելույթով՝ ընդգծելով կլիմայի փոփոխության, կենսաբազմազանության կորստի և աղտոտվածության խնդիրները փոխկապակցված մոտեցմամբ լուծելու անհրաժեշտությունը։ Նա նաև վերահաստատել է Հայաստանի պատրաստակամությունը՝ որպես COP17-ի նախագահող երկիր, համագործակցելու միջազգային գործընկերների հետ՝ կայուն զարգացման նպատակների առաջմղման ուղղությամբ։
ՀՀ ԱԳՆ-ի հաղորդագրությունը՝ ստորև․
«Հուլիսի 14-ին Նյու Յորքում՝ Կայուն զարգացման հարցերով բարձր մակարդակի քաղաքական ֆորումի շրջանակներում, ՀՀ ԱԳ նախարարի տեղակալ Ռոբերտ Աբիսողոմոնյանը մասնակցել և ելույթով հանդես է եկել «Կամրջելով գիտությունը, քաղաքականությունը և փորձառությունը՝ հասցեագրելու մոլորակային եռակի ճգնաժամը․ սիներգիաների ամրապնդումը հանուն ԿԶՆ-ների և 2030թ․-ից հետո կայուն ապագայի» խորագրով հարակից միջոցառմանը։
Իր ելույթում ԱԳ նախարարի տեղակալն ընդգծել է կլիմայի փոփոխության, կենսաբազմազանության կորստի և աղտոտվածության խնդիրները փոխկապակցված մոտեցմամբ հասցեագրելու անհրաժեշտությունը։ Այս համատեքստում շեշտել է Բելեմում Ռիոյի կոնվենցիաների գործող և առաջիկա նախագահությունների կողմից ստորագրված սիներգիաների վերաբերյալ համատեղ հայտարարության կարևորությանը: Հավելել է, որ COP17-ը կարող է նպաստել այդ քաղաքական հանձնառության հետագա ամրապնդմանը և միջազգային հանրության աջակցության ընդլայնմանը։
Մոլորակային եռակի ճգնաժամի արդյունավետ հաղթահարման համատեքստում ԱԳ նախարարի տեղակալ Ռոբերտ Աբիսողոմոնյանը կարևորել է ազգային մակարդակում ներառական մոտեցումը և բոլոր շահագրգիր կողմերի լիարժեք ներգրավվածության ապահովումը։ Ներկաների ուշադրությանն են ներկայացվել այս ուղղությամբ ՀՀ կառավարության կողմից իրականացվող ջանքերը։
ՀՀ ԱԳ նախարարի տեղակալը վերահաստատել է նաև Հայաստանի պատրաստակամությունը սիներգիաների ամրապնդման և կայուն ապագայի ապահովման ուղղությամբ բոլոր գործընկերների հետ համագործակցելու հարցում, այդ թվում` որպես Կենսաբազմազանության մասին կոնվենցիայի կողմերի 17-րդ համաժողովի (COP17) առաջիկա նախագահող երկիր»։
