10.07.2026 | 19:48
Քաղաքական խորհրդակցություններ՝ ՀՀ-ի և Իսպանիայի ԱԳՆ-ների միջև
Արարատի ցեմենտի գործարանի աշխատանքը վերականգնվել է
Տնտեսություն
10.07.2026 | 17:41
Արարատի ցեմենտի գործարանը վերսկսել է արտադրական գործընթացը։ Էկոնոմիկայի նախարարի տեղակալ Էդգար Զաքարյանը գործարան կատարած այցի ընթացքում հայտարարել է, որ նախարարությունը պատրաստ է աջակցել արտադրության ընթացքում առաջացող հնարավոր խնդիրների լուծմանը՝ ընդգծելով գործարանի անխափան աշխատանքի կարևորությունը տնտեսության և արդյունաբերության համար։
«ՀՀ էկոնոմիկայի նախարարի տեղակալ Էդգար Զաքարյանն այսօր այցելել է Արարատի ցեմենտի գործարան և տեղում ծանոթացել արտադրական գործընթացի կազմակերպմանը։ Շրջայցի ընթացքում նրան ուղեկցել է գործարանի գլխավոր տնօրենը։
Էդգար Զաքարյանը հայտնել է նախարարության պատրաստակամությունը աջակցելու գործարանի արտադրական գործունեության ընթացքում առաջացող հնարավոր խոչընդոտների լուծմանը։
Անդրադառնալով գործարանի աշխատանքի վերականգնման ընթացքին՝ նախարարի տեղակալը նշել է, որ արտադրական գործընթացի անխափան և անընդհատ պրոցեսը կարևոր է ինչպես արդյունաբերական ներուժի պահպանման, այնպես էլ տնտեսական ակտիվության խթանման տեսանկյունից»,- ասված է հաղորդագրությունում։
Հիշեցնենք, որ Արարատի ցեմենտի գործարանը հունիսի սկզբին դադարեցրել էր աշխատանքը՝ այն բանից հետո, երբ «Բարգավաճ Հայաստան» կուսակցության նախագահ, գործարանի սեփականատեր Գագիկ Ծառուկյանի նկատմամբ քրեական վարույթի շրջանակում իրականացվեցին քննչական գործողություններ։ Այդ օրերին գործարանի ղեկավարությունը հայտարարում էր, որ արտադրությունը ժամանակավորապես դադարեցվել է կազմակերպչական և կառավարման խնդիրների պատճառով։
