Մալիում ապստամբները խոցել են ՌԴ ՊՆ-ի «Աֆրիկյան կորպուսի» ուղղաթիռը. ՏԵՍԱՆՅՈՒԹ

Մալիում տուարեգ ապստամբները պնդում են, որ խոցել են Ռուսաստանի պաշտպանության նախարարության «Աֆրիկյան կորպուսին» պատկանող ուղղաթիռը, հաղորդում է Al Jazeera-ն, փոխանցում է Meduza-ն։

Միջադեպը տեսագրվել է, դրա իսկությունը հաստատել է OSINTWarfare-ը։ Անձնակազմի ճակատագիրը մնում է անհայտ: Մալիում հակամարտությունը լուսաբանող թուրք լրագրող Մահմութ Բոզարսլանի պնդմամբ՝ բոլոր ուղևորները զոհվել են։

Ռուսաստանի ՊՆ-ն չի մեկնաբանել ուղղաթիռի կորուստը, սակայն կործանման մասին գրել է «Աֆրիկար» տելեգրամ ալիքը, որը ոչ պաշտոնապես կապվում է նախարարության հետ։

Մալիում ռազմական կառավարությունը, որն իշխանության է եկել 2021 թվականին հեղաշրջման արդյունքում, զինված պայքար է մղում տուարեգ ժողովրդի դեմ, որը ցանկանում է ստեղծել իր սեփական անկախ պետությունը, ինչպես նաև «Ալ-Քաիդա»-ի իսլամիստների դեմ։ Ռուսաստանի պաշտպանության նախարարության «Աֆրիկյան կորպուսը» կռվում է պաշտոնական ռազմական իշխանությունների կողմից։

Վերջին անգամ ապստամբները ռուսական ռազմական ուղղաթիռ էին խոցել ապրիլին: Բոլոր ուղևորները զոհվել են։

Երկու ամիս առաջ կառավարական ուժերը կորցրել են երկրի հյուսիսում գտնվող կարևոր Քիդալ քաղաքը ապստամբ խմբավորումների հարձակման հետևանքով։ Մալիի պաշտպանության նախարարը սպանվել էր, իսկ «Աֆրիկյա կորպուսը»՝ կորուստներ կրել։

Ներկայում հիմնական մարտերը տեղի են ունենում Մալիի հյուսիսում գտնվող Անեֆիս քաղաքի մոտ։ Սակայն բախումներ են գրանցվել նաև Մալիի կենտրոնում։

Թարգմանությունը՝ Էմմա Չոբանյանի