ՀՀ դրոշը՝ բոլոր բնակավայրերի հիմնական մուտքերի մոտ, պատգամավորները երդման նոր տեքստ ունեն

Հայաստանի բոլոր բնակավայրերի հիմնական մուտքերի մոտ կտեղադրվի ՀՀ դրոշ։ Ազգային ժողովը 63 կողմ ձայնով ընդունեց «ՀՀ դրոշի մասին» օրենքում լրացումներ կատարելու նախագիծը։ Բացի այդ, պատգամավորները կունենան նաև երդման նոր տեքստ․ Ազգային ժողովը հաստատեց համապատասխան փոփոխությունները։

Երդումը կավարտվի հետևյալ նախադասությամբ․ «Փա՛ռք նահատակներին, և կեցցե՛ Հայաստանի Հանրապետությունը»։

Հիշեցնենք՝ վարչապետ Նիկոլ Փաշինյանը նույն նախադասությամբ է ավարտում է իր գրեթե բոլոր ելույթները։

Այսպիսով, առաջարկվող նոր երդման տեքստն ունի հետևյալ բովանդակությունը. «Հանուն Հայաստանի Հանրապետության հարատևության, անկախության, ինքնիշխանության և հզորացման՝ երդվում եմ բարեխղճորեն կատարել ժողովրդի ներկայացուցչի պարտականությունները, պահպանել Հայաստանի Հանրապետության Սահմանադրությունը և օրենքները, նպաստել ՀՀ պետականության ամրապնդմանը և շահերի պաշտպանությանը, անել ամեն ինչ քաղաքացիական համերաշխության, Հայաստանի Հանրապետության քաղաքացիների անվտանգության ու բարեկեցության, մարդու իրավունքների և ազատությունների պաշտպանության համար: Փա՛ռք նահատակներին և կեցցե՛ Հայաստանի Հանրապետությունը»:

Հեղինակներն ընդգծել են, որ փոփոխությունների հիմքում ընկած է պետականակենտրոն մոտեցումը, որտեղ պատգամավորի գործունեության առանցքը պետության պաշտպանությունն է: Տեքստում հատուկ տեղ է հատկացվել նաև մարդու իրավունքների պաշտպանության հանձնառությանը, իսկ եզրափակիչ մասում «Փառք նահատակներին» ձեւակերպման ավելացումը պետականության համար կյանքը զոհաբերած անձանց հիշատակին հարգանքի տուրք մատուցելու նպատակ ունի:

Եվգենյա Համբարձումյան