Աննա Հակոբյանը նոր խոսնակ ունի. նախկինը մեկ ամիս էլ չաշխատեց

Աննա Հակոբյանի խոսնակի պարտականությունները նոյեմբերի 20-ից կատարում է Հասմիկ Հարությունյանը:

Վարչապետի պաշտոնակատարի տիկնոջ մամուլի խոսնակի պաշտոնը զբաղեցնող Հասմիկ Հարությունյանն ավարտել է Հյուսիսային համալսարանի Ժուռնալիստիկայի ֆակուլտետը, որից հետո 2013-2014 թվականներին սովորել է Եվրոպայի խորհրդի քաղաքական դասընթացներ երևանյան դպրոցում, այնուհետև 2015-2018 թվականներին սովորել է Պետական կառավարման ակադեմիայի Քաղաքագիտության ֆակուլտետում:

Հասմիկ Հարությունյանը մասնագիտական վերապատրաստումներ է անցել Գերմանիայում, Խորվաթիայում, Լեհաստանում, Վրաստանում և այլուր: 2008-2013 թվականներին աշխատել է «Ազգ» օրաթերթում, 2013-2016 թվականներին «Արմենպրես» լրատվական գործակալությունում, 2016-2018 թվականներին աշխատել է Պաշտպանության նախարարությունում՝ Տեղեկատվության և հասարակայնության հետ կապերի վարչության Տեղեկատվական քաղաքականության բաժնի պետի տեղակալ:

Արդեն 2018 թվականի ապրիլի 7-ից մինչև նոյեմբերի 18-ը աշխատել է Արտակարգ իրավիճակների նախարարությունում Ճգնաժամային կառավարման ազգային կենտրոնի տեղեկատվության ապահովման և վիճակագրության բաժնի պետ:

Կոչումով փրկարար ծառայության մայոր է:

Հասմիկ Հարությունյանն արժանացել է նաև ԶՈՒ «Գարեգին Նժդեհ» մեդալի,հեղինակել է «Ուղեցույց հակամարության գոտում աշխատող լրագրողների համար»:

Տիրապետում է անգլերեն և ռուսերեն լեզուների:

Հիշեցնենք, որ մինչ այդ Աննա Հակոբյանի մամուլի քարտուղարի պարտականությունները կատարում էր Արփինե Զարգարյանը։

Հայտարարված մրցույթից հետո ընտրված Արփինե Զարգարյանն ընդամենը մեկ ամիս էլ չաշխատեց։ Թե որն է պատճառը, փորձեցինք պարզել Արփինե Զարգարյանից, սակայն նրա հետ կապ հաստատել չհաջողվեց։