Նոր տոնական օր՝ տոնացույցում․ ՏԵՍԱՆՅՈՒԹ

Կառավարությունն ընդունեց իմ առաջարկը, դա Նավասարդի տոնը տոնացույցում ընդգրկելն էր. կլինի օգոստոսի 11-ին և կլինի աշխատանքային օր: Այս մասին «ՀՀ տոների և հիշատակի օրերի մասին» օրենքում փոփոխություններ և լրացումներ կատարելու վերաբերյալ նախագծի ներկայացման ժամանակ ասաց անկախ պատգամավոր Գեղամ Նազարյանը։

«Ամեն դեպքում այդ օրը կարևոր է, որ մենք ունենանք տոնացույցում, որովհետև դա հայ ազգի ամենաառաջին իրադարձային տոնն է:

Փոփոխություններից նաև նշեմ, որ մենք ունենալու ենք արդեն հատուկ տոնացույցում ընդգրկված մարզերի և Երևանի օրեր, որոնք կնշվեն, հուսով եմ, պատշաճ մակարդակով: Գաղափարն այն է, որ Հայաստանի Հանրապետության քաղաքացին մեկը մյուսին սկսի լավ ճանաչել: Օրինակ՝ ասենք Լոռու օրն է. այդ օրը նշվի ոչ թե Վանաձորում կամ Ստեփանավանում, այլ ամբողջ հանրապետության քաղաքներում կկազմակերպվեն միջոցառումներ՝ նվիրված այդ մարզին, ինչը կնպաստի, որ մենք վերջապես պետական ազգ դառնալու ճանապարհին ևս մի կարևոր քայլ անենք:

Կարևորում եմ նաև, որ մեռելոց օրերը՝ հինգ մեռելոց օրերը, նույնպես տեղ են գտել մեր տոների և հիշատակի մասին օրենքում: Կարգավորումն էլ կանի կառավարությունը՝ այդ օրը լինի աշխատանքային, թե ոչ աշխատանքային: Ամեն դեպքում, երբ որ այդ օրը նշվում է տոնացույցում, այն արդեն դառնում է կարևոր օր, որովհետև պետությունը մարդու նման է՝ ոչ միայն պետք է մարմին ունենա, այլ նաև հոգի, և հոգևոր տոներ ու հիշատակի օրեր էլ պետք է ունենանք»,- ասաց նա։

Մանրամասները՝ տեսանյութում։