Ֆոն դեր Լայենից՝ պայուսակ, Մարթա Կոսից՝ փողկապ․ ինչ նվերներ է ստացել Փաշինյանը եվրոպացի պաշտոնյաներից

Վարչապետ Նիկոլ Փաշինյանը մայիսին Հայաստան ժամանած եվրոպացի դիվանագետներից նվերներ է ստացել։ Այդ մասին Factor.am-ը տեղեկանում է վարչապետի՝ Կոռուպցիայի կանխարգելման հանձնաժողով ներկայացրած պաշտոնիայի նվերների հաշվառման փաստաթղթից։

Եվրոպական հանձնաժողովի նախագահ Ուրսուլա ֆոն դեր Լայենը 162 հազար դրամ արժողության «RECIFE» ապրանքանիշի կաշվե պայուսակ է նվիրել Փաշինյանին։   Եվրոպացի դիվանագետը Հայաստան-ԵՄ անդրանիկ գագաթնաժողովի շրջանակում մայիսի 5-ին հյուրընկալվել էր նախագահական նստավայրում։

Նիկոլ Փաշինյանը նվեր է ստացել նաև ԵՄ ընդլայնման հարցերով հանձնակատար Մարթա Կոսից։ Նա վարչապետին «Salvatore Ferragamo» ապրանքանիշի կարմիր փողկապ է նվիրել։ Նվերի արժեքը կազմել է 94 հազար դրամ։

ԵՄ ընդլայնման հարցերով հանձնակատար Մարթա Կոսը պաշտոնական այցերով Հայաստանում է եղել մարտի 19-20-ը։ Վարչապետ Նիկոլ Փաշինյանը մարտի 19-ին ընդունել է Կոսի գլխավորած պատվիրակությանը:

Լատվիայի Հանրապետության նախագահ Էդգարս Ռինկևիչսի գլխավորած պատվիրակությունը մայիսի 7-ին Հայաստան է ժամանել։ Վարչապետը Կառավարությունում հյուրընկալել է եվրոպացի պաշտոնյային, որը նրան 70 հազար դրամ արժողությամբ an&angel ապրանքանիշի ապակյա աման է նվիրել։

Հիշեցնենք, որ «Հանրային ծառայության մասին» օրենքում կատարված փոփոխությունների արդյունքում սահմանվել են հանրային ծառայողների կողմից նվերներ ընդունելու վերաբերյալ  կանոններ։  Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:     

Անի Թամրազյան