Փաշինյանի որոշմամբ կարկտահարության դեպքերն ուսումնասիրող աշխատանքային խումբ է ստեղծվել

Վարչապետ Նիկոլ Փաշինյանի որոշմամբ ստեղծվել է աշխատանքային խումբ, որը կուսումնասիրի 2026 թվականի կարկտահարության դեպքերը, դրանց անոմալ լինելու հիմնավորվածությունը, պատճառված վնասների քանակական և ֆինանսական ցուցանիշները, ինչպես նաև հակակարկտային կայանների գործադրման և դրա ազդեցության հարցը։ Աշխատանքային խմբի ղեկավարը մեկշաբաթյա ժամկետում պետք է զեկուցի վարչապետին կատարված աշխատանքների արդյունքների մասին։

«Ղեկավարվելով «Կառավարության կառուցվածքի և գործունեության մասին» օրենքի 7-րդ հոդվածի 5-րդ և 16-րդ մասերով և Հայաստանի Հանրապետության կառավարության 2021 թվականի փետրվարի 25-ի N 252-Լ որոշման հավելվածի
130-րդ կետով`

1. 2026 թվականի կարկտահարության դեպքերի ուսումնասիրության, դրանց անկանոն (անոմալ) լինելու հիմնավորվածության, արդյունքում հասցված վնասների քանակական և ֆինանսական ցուցանիշների, ինչպես նաև կարկտահարության վայրերում կամ դրանց մոտակայքում կարկուտ տեղալուց առաջ կամ դրանց ընթացքում հակակարկտային կայանների գործադրման և դրա ազդեցության գնահատման նպատակով ստեղծել աշխատանքային խումբ:

2. Հաստատել աշխատանքային խմբի կազմը` համաձայն հավելվածի:

3. Աշխատանքային խմբի ղեկավարին՝ կատարած աշխատանքների արդյունքների վերաբերյալ մեկշաբաթյա ժամկետում զեկուցել Վարչապետին»,- ասված է որոշման մեջ։

Նշենք, որ վարչապետի որոշմամբ աշխատանքային խումբ ստեղծելու անհրաժեշտությունն առաջացել է հունիսին Շիրակի մարզում և Գյումրիում արձանագրված ուժեղ կարկտահարությունների ֆոնին։ Հունիսի 11-ին Գյումրիում տեղացած կարկուտի հետևանքով ջրալցվել էին տներ, անձրևաջրերի կուտակման պատճառով արգելափակվել էին ավտոմեքենաներ, իսկ Փրկարար ծառայության ստորաբաժանումներն իրականացրել էին տարհանման, ջրահեռացման և մաքրման աշխատանքներ։

Հունիսի 19-ին Շիրակի մարզի Հայկավան գյուղում, ըստ Հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանի, տեղացել էր հավկիթի մեծության կարկուտ։ Մեկ օր անց՝ հունիսի 20-ին, կարկուտը խոշոր վնաս էր հասցրել նաև Գյումրիի Մուշ և Անի թաղամասերին․ վնասվել էին բազմաթիվ ավտոմեքենաներ, կոտրվել բազմաբնակարան շենքերի պատուհաններ։