Հանձնաժողովների ՀՀԿ-ական նախագահներին և քարտուղարներին չեզոքացնու՞մ են. ինչ մտավախություն ունի իշխանությունը

Ընտրատեղամասերում հանձնաժողովի նախագահների և քարտուղարների փոփոխություններ են տեղի ունենում: Այս մասին փոխանցում են Factor.am-ի աղբյուրները: Բանն այն է, որ ԿԸՀ-ն 2018 թվականի նոյեմբերի 15-ի նիստում որոշել է, որ ՀՀԿ-ն Հայաստանի ամբողջ ընտրատեղամասերում ունենալու է 1110 նախագահ և քարտուղար, «Ծառուկյան» կուսակցությունների դաշինքը հանձնաժողովի նախագահ և քարտուղար ունենալու է 594 ընտրատեղամասերում, ԵԼՔ կուսակցությունների դաշինքն էլ միասին վերցրած՝ ունենալու է 172, ՀՅԴ-ն՝ 134:

Սա, մեղմ ասած, նոր իշխանությունների սրտով չի եղել, և նրանք ձեռնամուխ են եղել, որ ՀՀԿ-ական հանձնաժողովի նախագահներն ու քարտուղարները փոխարինվեն չեզոք անձանցով: Իհարկե, խոսքը ոչ բոլորի մասին է: Իշխանությունների այս ցանկությունը եղել է պատճառ, որ հանձնաժողովների բազմաթիվ նախագահներ և քարտուղարներ ինքնաբացարկ հայտնեն: Օրվա իշխանությունը կասկածներ է ունեցել, որ հանձնաժողովների ՀՀԿ-ական նախագահներն ու քարտուղարները նախկին մեթոդներով «կաշխատեն» ՀՀԿ-ի համար:

Կենտրոնական ընտրական հանձնաժողովի նախագահ Տիգրան Մուկուչյանը մեզ հետ զրույցում չհերքեց տեղեկությունները, որ հանձնաժողովի նախագահներն ու քարտուղարները ինքնաբացարկներ են հայտնում:

«Եղել են ինքնաբացարկներ, բայց որ կուսակցությունից որ ինքնաբացարկ են հայտնել, այդ նույն կուսակցությունն էլ տեղը համալրում է: Ինքնաբացարկներ միշտ էլ լինում են, նրանք ինքնաբացարկներ կարող են ներկայացնել քվեարկությունից հինգ օր առաջ»,- ասաց Մուկուչյանը:

Հարցին էլ՝ մինչ այս պահը քանի հոգի է ինքնաբացարկ հայտարարել, նա պատասխանեց. «Չեմ կարող ասել, որովհետեւ դա անընդհատ լինող պրոցես է»:

Տեղեկացանք նաև, որ ինքնաբացարկ ներկայացրած անձանց ՀՀԿ-ի քվոտայի տակ փոխարինում են այլ անձինք, ովքեր կապ չունեն այս կուսակցության հետ:

Հայկ Վարդանյան