26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Ուկրաինան 400 քառակուսի կմ տարածք է վերադարձրել` ռուսական ուժերի համար Starlink-ի արգելափակումից հետո
Քաղաքականություն
22.05.2026 | 15:01
Այս տարվա սկզբին հակագրոհի արդյունքում ուկրաինական ուժերը վերադարձրել են Ռուսաստանի կողմից վերահսկվող շուրջ 400 քառակուսի կիլոմետր տարածք, այն բանից հետո, երբ SpaceX-ի Starlink շարժական ինտերնետային տերմինալների հազարավոր սարքեր անհասանելի են դարձել ռուսական զորքերի համար։ Այս մասին հայտնել է Bloomberg-ը՝ հղում անելով ԱՄՆ Պատերազմի նախարարության հետախուզական վարչության զեկույցին, գրում է BBC-ի ռուսական ծառայությունը։
Երկար ժամանակ հուսալի և հասանելի Starlink արբանյակային կապի համակարգը մեծ առավելություն էր Ուկրաինայի զինված ուժերի համար: SpaceX-ն արգելափակել է Ռուսաստանի մուտքը համակարգ, այն այլևս չէր գործում ՌԴ տարածքում:
Սակայն ժամանակի ընթացքում պարզ դարձավ, որ ռուսները դեռևս գտնում էին տերմինալներ ձեռք բերելու եղանակներ, հիմնականում դրանք երրորդ երկրներից գնելով միջնորդների միջոցով: Անցյալ դեկտեմբերին հաղորդվել էր Starlink-ով հագեցած անօդաչու թռչող սարքերի՝ ուկրաինական ուժերի դեմ օգտագործման առաջին դեպքերի մասին։
Ըստ Bloomberg-ի, սակայն, Ռուսաստանի ռազմական կարողությունները «զգալիորեն թուլացել են» այն բանից հետո, երբ Ուկրաինայի իշխանությունները փետրվարին միջոցներ ձեռնարկեցին Starlink-ի հազարավոր տերմինալներ շարքից դուրս բերելու համար։
Ուկրաինայի կառավարությունը «սպիտակ ցուցակ» էր գործարկել՝ թույլ տալով երկրում գործել միայն ստուգված և գրանցված Starlink տերմինալները, իսկ մյուս բոլորն անջատել՝ չգրանցված տերմինալները արգելափակելու վերաբերյալ SpaceX-ի հետ համաձայնության գալուց հետո։
Արդյունքում գրանցվել էր առաջնագծում ռուսական հարձակումների թվի նվազում։
Թարգմանությունը՝ Էմմա Չոբանյանի
