10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
ՀՀԿ-ում չեն կողմորոշվում՝ փողոցային քարոզարշավ կիրականացնեն, թե՞ ոչ
Քաղաքականություն
23.11.2018 | 17:59
Հանրապետական կուսակցությունում դեռեւս չեն կողմնորոշվել, թե ինչպիսի մարտավարություն կորդեգրեն քարոզարշավի ընթացքում: Factor.am-ի հետ զրույցում ԱԺ փոխնախագահ, ՀՀԿ-ական Արփինե Հովհաննիսյանն, արձագանքելով մեր հարցին՝ արդյոք փողոցային քարոզարշավ իրականացնելո՞ւ են, ասաց՝ դեռևս քննարկումներ են ընթանում: Հիշեցնենք՝ մամուլում լուրեր են շրջանառվում, որ Հանրապետական կուսակցությունը փողոցային քարոզարշավ չի անցկացնելու:
Հարցն ուղղեցինք նաև ԱԺ ՀՀԿ խմբակցության պատգամավոր, արտաքին հարաբերությունների մշտական հանձնաժողովի նախագահ Արմեն Աշոտյանին. «Իսկ դահլիճներում, փողոցներում և բակերում ո՞ւմ հետ ենք քարոզարշավ անելու, եթե ոչ մարդկանց: ՀՀԿ թեկնածուները յուրաքանչյուրն իր ընտրատարածքում իրականացնելու է քարոզչություն՝ ելնելով և՛ ստեղծված իրավիճակից, և՛ քարոզչական ամենաարդյունավետ ձևերն օգտագործելու հրամայականից: Այդ ձևերը բազմազան են՝ դահլիճային հանդիպումներ, հանդիպումներ մարդկանց հետ տարբեր ձևաչափերով, ԶԼՄ-ներ: Մենք բոլոր տեսակի քարոզչական միջոցներն օգտագործելու ենք: Եթե Ձեր հարցի իմաստն այն է, որ արդյո՞ք մենք երթ անելու ենք, մենք երթ չենք անելու: Չեմ կարծում, որ քաղաքական ուժի ցուցադրությունը պետք է իրականացվի կամ փոխարինվի բացառապես զանգվածային ակցիաներով, այլ քաղաքական ասելիքը պետք է ուժեղ լինի: Իսկ այդտեղ մեզ մրցակից գրեթե չենք տեսնում»,- ի պատասխան մեր հարցին՝ ասաց ՀՀԿ փոխնախագահն՝ առանց հստակեցնելու կլինե՞ն փողոցային, բակային հանդիպումներ քաղաքացիների հետ:
ՀՀկ խոսնակ Էդուարդ Շարմազանովն էլ իր հերթին ընդգծեց, որ քարոզարշավը կիրականացնեն այնպես, որ կուսակցության համար արդյունավետ լինի:
«Եթե մեկն ուզում է դուրս գա զուռնա դհոլով երգի, թող դուրս գա, երգի, մեկն ուզում է երթ անի, թող երթ անի, մեկն ասուլիս է ուզում, թող դա անի»,- ասաց Շարմազանովն, ապա ընդգծեց՝ ինքը Լոռու մարզու է անցկացնելու քարոզարշավը և այդ շրջանակում չի բացառում ո՛չ երթերը, ո՛չ հանդիպումները, ո՛չ ուղիղ հեռարձակումները, ո՛չ դահլիճային հանդիպումները:
Ուշագրավ է, որ ընդամենը երկու օր է մնացել, որպեսզի պաշտոնապես մեկնարկի նախընտրական քարոզարշավը, սակայն Հանրապետականը դեռևս չի բացում փակագծերը՝ դուրս կգա՞ փողոց մարդկանց հետ շփվելու, թե՞ քարոզարշավի անցկացման այլ ձևաչափ կընտրի:
