Երեխայի նկատմամբ բռնության ցանկացած դրսևորում բացարձակապես անթույլատրելի է. ՄԻՊ-ը՝ Վեդիում անչափահասների մասնակցությամբ դեպքի մասին

Մարդու իրավունքների պաշտպան Անահիտ Մանասյանը խիստ մտահոգիչ է համարում Վեդի քաղաքում երեխաներին առնչվող դեպքի վերաբերյալ տեղեկատվությունը և շեշտում, որ երեխայի նկատմամբ բռնության ցանկացած դրսևորում բացարձակապես անթույլատրելի է և ենթակա է պատշաճ իրավական գնահատականի։ Այս մասին ասված է ՄԻՊ աշխատակազմի տարածած հաղորդագրությունում։

«Սույն դեպքի հանգամանքները պահանջում են ամբողջական և օբյեկտիվ քննություն և այդ առումով նաև պատշաճ հանրային հաղորդակցություն։ Միաժամանակ, Պաշտպանն ընդգծում է, որ նման զգայուն իրավիճակներում երեխային վերաբերող նույնականացնող տվյալների հրապարակումը, այդ թվում՝ դպրոցի, առողջական վիճակի կամ զարգացման առանձնահատկությունների վերաբերյալ, և այլ ուղղակի կամ անուղղակի նույնականացման հնարավորություն ստեղծող տեղեկությունների տարածումը, չեն բխում երեխայի լավագույն շահից և կարող են վնասել երեխային»,- ասված է հաղորդագրությունում։

Պաշտպանի աշխատակազմն ընդգծում է, որ հատկապես բռնության դեպքերի համատեքստում երեխային վերաբերող հրապարակումները պետք է իրականացվեն այնպես, որ դրանց արդյունքում երեխան չհայտնվի առավել անպաշտպան և խոցելի վիճակում։

«Պաշտպանը շեշտում է՝ երեխային առնչվող նյութերի լուսաբանումը պետք է իրականացվի «մի՛ վնասիր» սկզբունքի, պատասխանատու լրագրության կանոնների պահպանմամբ՝ լիարժեք կերպով ապահովելով երեխայի անձնական տվյալների պաշտպանությունը, հատուկ կարևորելով հրապարակումների պատրաստման հարցում զգոնության և նրբանկատության ցուցաբերումը»,- նշված է հաղորդագրությունում։

Դեպքի առնչությամբ Մարդու իրավունքների պաշտպանի աշխատակազմում ՄԻՊ մանդատի շրջանակում իրականացվում է ուսումնասիրություն։

Ավելի վաղ տեղեկացրել էինք, որ Վեդիում անչափահաս քույրերը սեռական բռնության են ենթարկվել։ Քննչական կոմիտեն ներկայացրել է Վեդի քաղաքում անչափահաս քույրերի վերաբերյալ լայն տարածում ստացած դեպքերի նախաքննության ընթացքում պարզված հանգամանքները՝ նշելով, որ տուժողների ցուցմունքները հակասական են, նշանակվել են համալիր փորձաքննություններ, և իրականացվում են անհրաժեշտ գործողություններ՝ դեպքի իրական պատկերը պարզելու համար։