06.08.2026 | 14:44
Վահագն Ալեքսանյանի ճեպազրույցը. ՈՒՂԻՂ
Ինչո՞ւ է հետաձգվել Մանվել Գրիգորյանին 20 միլիոն դրամ գրավով ազատ արձակելու միջնորդության քննությունը
Հասարակություն
20.11.2018 | 17:18
ԱԺ նախկին պատգամավոր, արդեն մի քանի ամիս կալանքի տակ գտնվող Մանվել Գրիգորյանի գործով դատական նիստը երեկ հետաձգվել է անհայտ ժամանակով։ Այս մասին Factor.am-ին ասաց փաստաբան Արսեն Մկրտչյանը․ «Հաջորդ նիստի օրը չի նշանակվել, մեզ դատարանից պատասխանեցին, որ օրվա հետ կապված իրենք կտեղեկացնեն»։
Մանվել Գրիգորյանի պաշտպանի խոսքով՝ Երևանի ընդհանուր իրավասության դատարանի Շենգավիթի նստավայրի դատավոր Մարինե Մելքոնյանը նիստը հետաձգել է, քանի որ «հրահանգ» չի ունեցել, թե ինչ որոշում կայացնի․ «Իմ կարծիքով, քանի որ ՀՔԾ պետը ասուլիս չէր տվել, վարչապետը «լայվ» չէր մտել, մեր գրավի միջնորդության վերաբերյալ դատավորը չգիտեր` ինչ անել և որոշեց նիստը հետաձգել»։
Փաստաբանից տեղեկացանք, որ Մանվել Գրիգորյանի առանձնատան պահեստից հայտնաբերված տուշոնկաներն ու խտացրած կաթերը, նախնական հաշվարկով, կազմել են 7 միլիոն դրամ, բայց փաստաբանի խոսքով՝ դրանք օդից վերցրած թվեր են և շատ ավելի քիչ գումար պիտի նշվի։
Հիշեցնենք, որ Մանվել Գրիգորյանը մեղադրվում է ապօրինի զենք-զինամթերք պահելու և առանձնապես խոշոր չափի յուրացում կատարելու մեջ: ԱԱԾ-ն տեսանյութ էր հրապարակել Մանվել Գրիգորյանի առանձնատանն իրականացված խուզարկությունից, որտեղ հայտնաբերվել էր, որ ապրիլյան քառօրյայի մասնակիցներին ուղարկված սնունդը գեներալ Մանվել Գրիգորյանն օգտագործել է իր կենդանաբանական այգու կենդանիներին կերակրելու նպատակով։ Հայտնաբերվել էին նաև զինվորներին ուղարկված նամակներ, ինչպես նաև մեծ քանակությամբ զենք և զինամթերք։
Լիլիթ Շաբոյան
