Իրանում քննարկվել է Մեղրիի ազատ տնտեսական գոտում գործունեության ուղղությունները

Իրանում ՀՀ դեսպան Արտաշես Թումանյանն ապրիլի 30-ից մայիսի 1-ին այցելել է Իրանի Կենտրոնական նահանգ (մայրաքաղաքը՝ Արաք), որտեղ հանդիպումներ է ունեցել նահանգապետ Մահմուդ Զամանի Ղոմիի, տնտեսական հարցերով փոխնահանգապետ Զաֆար Աֆշունի, քաղաքաշինության հարցերով փոխնահանգապետ Ազիզ Ֆիլիի, Արաք քաղաքի ղեկավարության, նահանգի արդյունաբերության, հանքերի և առևտրի պալատի ներկայացուցիչների և գործարարների հետ:

ԱԳՆ-ից հայտնում են, որ նահանգապետի հետ հանդիպման ընթացքում կողմերը քննարկել են հայ-իրանական հարաբերությունների զարգացմանն առնչվող մի շարք հարցեր: Առանձին ուշադրության են արժանացել տնտեսական և միջմարզային համագործակցությունը:

Դեսպան Թումանյանը նահանգապետին է ներկայացրել Հայաստանում ներդրումային ծրագրերի իրականացման հնարավորությունները, մասնավորապես՝ Մեղրիի ազատ տնտեսական գոտում գործունեության ուղղությունները, ԵՏՄ-ԻԻՀ համագործակցության շրջանակներում հայկական կողմի մասնակցությանն առնչվող հարցեր:

Տնտեսական և քաղաքաշինության գծով փոխնահանգապետերի, Արաք քաղաքի ղեկավարության հետ հանդիպման ժամանակ դեսպան Թումանյանը ներկայացրել է երկկողմ տնտեսական, զբոսաշրջային, մշակութային, գիտակրթական և ապակենտրոնացված համագործակցության վերաբերյալ հայկական կողմի առաջարկությունները:

Դեսպան Թումանյանն այցելել է «Կենտրոնական նահանգի արդյունաբերական ավանների ընկերություն», որի տնօրենների խորհրդի նախագահ Մոսթաֆա Ամերեն ներկայացրել է հիշյալ ընկերության մեջ մտնող 2500 արդյունաբերական ձեռնարկությունների գործունեությունը և ներդրումային պայմանների առավելությունները:

Առանձին հանդիպում է տեղի ունեցել գյուղատնտեսության և գյուղմթերքների վերամշակման ձեռնարկությունների ներկայացուցիչների հետ:

Կենտրոնական նահանգի արդյունաբերության, հանքերի և առևտրի պալատում տեղի է ունեցել Իրանում Հայաստանի դեսպանի հանդիպումը նահանգի պաշտոնյաների և շուրջ 100 գործարարների հետ։ Դեսպան Թումանյանը գործարարներին հանգամանալից տեղեկատվություն է ներկայացրել Հայաստանի օրենսդրության, իրականացվող և առաջարկվող տնտեսական ծրագրերի, գործող առևտրային ռեժիմների, գործարար միջավայրի, ազատ տնտեսական գոտիների, զբոսաշրջության, ԵՏՄ-ԻԻՀ հարաբերությունների, Սև ծով-Պարսից ծոց տրանսպորտային միջանցքի և մի շարք այլ հարցերի մասին:

Կենտրոնական նահանգում ՀՀ դեսպանն այցելել է մի շարք ձեռնարկություններ, որոնց ղեկավարության հետ քննարկվել են Հայաստանում համատեղ ծրագրեր իրականացնելու խնդիրները:

Դեսպան Թումանյանը եղել է Արաք քաղաքի պատմամշակութային հնավայր համարվող շուկայում, որտեղ մասնակցել է երիտասարդ արվեստագետների կազմակերպած նկարչական ցուցահանդեսին:

Արաքում Արտաշես Թումանյանը նաև այցելել է քաղաքի Սուրբ Մեսրոպ հայկական եկեղեցի և հանդիպել հայ համայնքի ներկայացուցիչների հետ: