03.04.2026 | 19:00
Տոմս կա, թռիչք չկա․ ինչպես վերադարձնել չեղարկված հանգստի գումարները. ՏԵՍԱՆՅՈՒԹ
Վարդան Ղուկասյանի որդու նկատմամբ կիրառված տնային կալանքը կբողոքարկվի
Հասարակություն
03.04.2026 | 11:32
Գյումրիի քաղաքապետ Վարդան Ղուկասյանի որդու՝ Սպարտակ Ղուկասյանի նկատմամբ կիրառված այլընտրանքային խափանման միջոց տնային կալանքը կբողոքարկվի։ Այս մասին Factor TV-ի հարցմանն ի պատասխան հայտնեցին Գլխավոր դատախազությունից։
Երեկ հայտնի դարձավ, որ կրտսեր Ղուկասյանի խափանման միջոց կալանքը մարտի 20-ին փոխվել է տնային կալանքով։
Հիշեցնենք՝ Սպարտակ Ղուկասյանը մի քանի քրեական վարույթներով է անցնում։ Մասնավորապես, անցած տարվա սեպտեմբերին Քննչական կոմիտեն հաղորդագրություն տարածեց, որ քրեական վարույթի նախաքննության ընթացքում մեկ անձի նկատմամբ հարուցվել է հանրային քրեական հետապնդում՝ Քրեական օրենսգրքի 258-րդ հոդվածի 1-ին մասի 4-րդ կետով (շորթումը՝ հարկադրանքի այլ եղանակով)։ Այդ անձը Սպարտակ Ղուկասյանն էր, նրա նկատմամբ ընտրվել էր խափանման միջոց տնային կալանքը, որը հետագայում փոխվեց։
Արդեն նոյեմբերին Հակակոռուպցիոն դատարանում հոր՝ Վարդան Ղուկասյանի նիստից հետո դահլիճում հայհոյելու համար, Սպարտակ Ղուկասյանին նոր մեղադրանք առաջադրվեց՝ հաղորդակցման կամ տեղեկատվական տեխնոլոգիաներն օգտագործելով խուլիգանություն կատարելու հոդվածի հատկանիշներով։ Հենց այս մեղադրանքով էր նրա նկատմամբ կիրառվել խափանման միջոց կալանքը։
Շաբաթներ առաջ՝ փետրվարին, նրան նոր մեղադրանք առաջադրվեց, ըստ որի՝ կրտսեր Ղուկասյանը խմբի կազմում կազմակերպել և ղեկավարել է պաշտոնատար անձի օրինական ծառայողական գործունեությանը միջամտելու նպատակով պաշտոնատար անձի գույքի վնասում և ոչնչացում և նույն նպատակով պաշտոնատար անձի նկատմամբ բռնության գործադրում, ինչպես նաև՝ կազմակերպել և ղեկավարել է հասարակական անվտանգությանը սպառնացող զանգվածային անկարգություններ, որոնք զուգորդվել են բռնության գործադրմամբ, գույք ոչնչացնելով և վնասելով։
Ռոզա Վարդանյան
