Ամերիկացիներն ինձ ասում էին՝ եթե ռուսները չկարողանան պաշտպանել արցախահայերին, ավելի լավ չէ՞ նրանց Հայաստան բերել․ Արսեն Խառատյան․ ՏԵՍԱՆՅՈՒԹ

«Ամերիկացիները դեռ 2022-ին ինձ ասում էին․ եթե Ռուսաստանը չի կարող պաշտպանել Ղարաբաղի հայերին, միգուցե պետք է նրանց բերել Հայաստան»․ Factor TV-ի հետ զրույցում Aliq Media-ի ղեկավար Արսեն Խառատյանը բավական կոշտ և ուղիղ գնահատականներ է տալիս թե՛ տարածաշրջանային զարգացումներին, թե՛ Հայաստանի ներքաղաքական իրականությանը։

Նրա խոսքով՝ ԱՄՆ-ի մոտեցումը տարբեր ճգնաժամերի դեպքում նույնը չի եղել․ 2022-ին, երբ հարձակումներ էին Ջերմուկի ու Վարդենիսի ուղղությամբ, Վաշինգտոնը միջամտեց և օգնեց կանգնեցնել իրավիճակը, մինչդեռ Լեռնային Ղարաբաղի դեպքում նման արձագանք չեղավ։

Խոսելով խաղաղության գործընթացից և ընդդիմության կողմից շրջանառվող երաշխավորի ինստիտուտի գաղափարից՝ Խառատյանը փաստում է՝ այսօր արդեն կա դե ֆակտո երաշխավոր, և դա ԱՄՆ-ն է։ Միաժամանակ, նա ընդգծում է՝ իրական, երկարատև խաղաղությունը չի կարող կառուցվել միայն արտաքին երաշխիքների վրա․ միակ իրական մեխանիզմը Հայաստանի և Ադրբեջանի միջև փոխկախվածության ձևավորումն է։

Անդրադառնալով ենթակառուցվածքային նախագծերին՝ նա նշում է, որ Ռուսաստանի ֆորմալ մասնակցությունը, այդ թվում՝ TRIPP-ին, գործնականում անհնար է, բայց դա չի նշանակում, որ Մոսկվան դուրս է մնում խաղից․ այն կարող է պարզապես օգտագործել այդ ենթակառուցվածքները։

Ներքաղաքական թեմայով Խառատյանի գնահատականը նույնպես բավական կոշտ է․ նրա խոսքով՝ խորհրդարան մտնելու շանս ունեցող ընդդիմադիր ուժերը հիմնականում կրկնում են ռուսական խոսույթներ, մինչդեռ իշխանությունն իր հերթին հաճախ մանիպուլացնում է իր արևմտամետ դիրքավորումը։

Ընդհանուր առմամբ, նա արձանագրում է, որ Հայաստանում իրական գաղափարական կուսակցություններ գրեթե չկան․ քաղաքական դաշտը ձևավորվում է կամ օլիգարխիկ նախագծերի շուրջ, կամ նույն մարդկանց միջոցով, որոնք տարիների ընթացքում անցել են տարբեր կուսակցություններով՝ ՀՀՇ-ից ու Դաշնակցությունից մինչև Հանրապետական և նույնիսկ Կոմունիստական կուսակցություն։

Հարցազրույցն ամբողջությամբ՝ տեսանյութում։

Սամվել Մելիքսեթյան