27.06.2026 | 15:37
Փամբակ գետում մեքենա և դի են հայտնաբերվել․ փրկարարները որոնում են երկրորդ անձին
Ըստ մեղադրանքի՝ ԿԳՄՍ նախարարության աշխատակիցը շուրջ 187 միլիոն դրամ է հափշտակել․ երկու անձի մեղադրանք է առաջադրել, գործը դատարանում է
Հասարակություն
24.03.2026 | 18:49
ՀՀ Կրթության, գիտության, մշակույթի և սպորտի նախարարության Բարձրագույն կրթության և գիտության կոմիտեի երկու բարձրաստիճան պաշտոնյաների մեղադրանք է առաջադրվել շուրջ 187 միլիոն դրամի չարաշահումների գործով և ոչ միայն։ Կոմիտեի ֆինանսատնտեսագիտական և հաշվապահական հաշվառման բաժնի պետ-գլխավոր հաշվապահ Տիգրան Գալստյանը մեղադրվում է առանձնապես խոշոր չափերով հափշտակության և կեղծ փաստաթղթեր օգտագործելու համար, իսկ կոմիտեի գլխավոր քարտուղար Լևոն Ֆարմանյանը՝ պաշտոնեական անփութության համար, որն առաջացրել է ծանր հետևանքներ։
Տիգրան Գալստյանի մեղադրանքը
Ըստ առաջադրված մեղադրանքի՝ Տիգրան Գալստյանը, զբաղեցնելով կոմիտեի գլխավոր հաշվապահի պաշտոնը 2008 թվականի սեպտեմբերի 2-ից, օգտագործել է իր ծառայողական լիազորությունները՝ պետական բյուջեից հատկացված միջոցներից հափշտակելու համար։ Նա մեղադրվում է վճարման հանձնարարականներում կեղծ տվյալներ մտցնելու, խաբեության և Կոմիտեի գլխավոր քարտուղարների վստահությունը չարաշահելու համար։
Մեղադրական եզրակացության համաձայն՝ 2019-2024 թվականների ընթացքում «Գիտական ենթակառուցվածքի արդիականացում» ծրագրի շրջանակում գիտական կազմակերպությունների կողմից չօգտագործված և Կոմիտեի հաշվին վերադարձված 210,946,800 ՀՀ դրամը Գալստյանը պետական բյուջե փոխանցելու փոխարեն, տարբեր կեղծ հիմնավորումներով, ընդհանուր առմամբ 212,106,000 ՀՀ դրամ փոխանցել է ՀՀ տարբեր առևտրային բանկերում իր անվամբ բացված հաշվեհամարներին։ Այդ գումարից, ըստ մեղադրանքի, նա հափշտակել է 187,506,457 ՀՀ դրամ։
Լևոն Ֆարմանյանի մեղադրանքը
Կոմիտեի գլխավոր քարտուղար Լևոն Ֆարմանյանը, որը պաշտոնավարում է 2021 թվականի սեպտեմբերի 17-ից, մեղադրվում է իր ծառայողական պարտականությունների նկատմամբ անբարեխիղճ և անփույթ վերաբերմունքի համար։ Ըստ մեղադրանքի՝ նա, պատասխանատու լինելով կոմիտեի ֆինանսական գործառնությունների իրականացման համար, պատշաճ կերպով չի կատարել իր պարտականությունները, ինչի հետևանքով անզգուշությամբ պետությանը պատճառվել է առանձնապես խոշոր չափերի գույքային վնաս։
Տիգրան Գալստյանի նկատմամբ համակցված, բացակայելու արգելքի հետ միասին, այլընտրանքային խափանման միջոց է կիրառվել պաշտոնավարման կասեցումը։
Լևոն Ֆարմանյանի նկատմամբ համակցված, բացակայելու արգելքի հետ միասին, այլընտրանքային խափանման միջոց է կիրառվել նաև գրավ և պաշտոնավարման կասեցում։
Գործը մարտի 11-ին Հակակոռուպցիոն դատարան է ուղարկվել և մակագրվել դատավոր Մերի Մոսինյանին։
Եվգենյա Համբարձումյան
