Խորթ մոր կողմից դաժան ծեծի ենթարկված փոքրիկը մահացել է

Մարտի 16-ին «կլինիկական մահ» ախտորոշմամբ Արաբկիր բժշկական կենտրոն տեղափոխված 1-ամյա երեխայի կյանքը փրկել չի հաջողվել: Այս մասին Factor.am-ին հայտնեցին ԲԿ-ից:

«Բժիշկներին հաջողվել էր վերականգնել երեխայի կենսական ֆունկցիաները։ Վերջին օրերին նա գտնվում էր վերակենդանացման բաժանմունքում`ծանր վիճակում, և բժիշկները շարունակում էին պայքարել նրա կյանքի համար։ Ցավոք, մարտի 21-ին արձանագրվել է երեխայի կենսաբանական մահը»,- հայտնում են ԲԿ-ից:

Հիշեցնենք, որ 1 տարեկան երկու ամսական երեխան ԲԿ էր տեղափոխվել մարտի 16-ին՝ «կլինիկական մահ» ախտորոշմամբ։

Ժամեր անց ՆԳՆ-ն հայտնել էր, որ Արարատի մարզում մեկ տարեկան երեխայի սպանության փորձի համար ձերբակալվել է մեկ անձ։

Գլխավոր դատախազությունից հայտնել են, որ 1-ամյա երեխան այս տարվա հունվարի 22-ից մինչև մարտի 10-ը պարբերաբար ֆիզիկական ներգործության է ենթարկվել, իսկ մարտի 15-ին փորձել են դիտավորությամբ կյանքից զրկել փոքրիկին։ Հանրային քրեական հետապնդում էր հարուցվել երեխայի հոր երկրորդ կնոջ նկատմամբ։ Նա երկու ամսով կալանավորվել է։

Նշենք, որ մահացած փոքրիկի մորական տատը Ազատություն TV-ին պատմել էր, որ զանգահարել են իր տղային, ասել՝ երեխան տաքություն ունի, բայց հետո որդին մորն ասել է․ «Ի՞նչ տաքություն, ի՞նչ բան, ընենց էր ջնջխել երեխուն, ընդեղ երեխա չկա։ Ոտերն էլ ջարդած, թևերն էլ ջարդած, ընդեղ երեխա չկա»։ Երեխայի տատի պնդմամբ՝ տանը, որտեղ բռնության են ենթարկել թոռին, ոչ մի արյունակից չի եղել։ Նրա խոսքով՝ պաշտոնական հաղորդագրություններում հայր անվանվողը երեխայի կենսաբանական հայրը չէ։

Արփի Հակոբյան