Ուղևորափոխադրումների ոլորտում գործող ապահովագրական պահանջների մասով նախատեսվում են նոր կարգավորումներ

2021 թվականին Եվրոպական միությունը եւ Հայաստանի Հանրապետությունը ստորագրել են ՀՀ, ԵՄ եւ անդամ երկրների միջեւ «Ընդհանուր ավիացիոն գոտու մասին» համաձայնագիրը, որով սահմանված են ավիացիոն անվտանգության, անվտանգային եւ օդային երթեւեկության կառավարման բարձր չափանիշներ: Համաձայնագրի դրույթներին համահունչ Հայաստանի Հանրապետությունը պետք է ՀՀ օրենսդրությունը շարունակաբար համապատասխանեցնի ԵՄ ավիացիոն կանոնակարգերին եւ չափանիշներին այնպիսի ոլորտներում, ինչպիսիք են՝ ավիացիոն անվտանգությունը, օդային երթեւեկության կառավարումը, շրջակա միջավայրը, տնտեսական կարգավորումները, մրցակցությունը եւ այլն:

Այս մասին ասել է ՀՀ տարածքային կառավարման եւ ենթակառուցվածքների նախարարի տեղակալ Արմեն Սիմոնյանը: Նա առաջին ընթերցմամբ քննարկման է ներկայացրել «Օդային փոխադրումներ իրականացնողների եւ օդանավ շահագործողների համար ուղեւորների, թռիչքային եւ սպասարկող անձնակազմի, ուղեբեռի, բեռի եւ երրորդ անձանց նկատմամբ պատասխանատվության ապահովագրության նվազագույն պահանջների սահմանման մասին» օրենքի նախագիծը:

Զեկուցողի խոսքով նախագծով ուղեւորների թռիչքային եւ սպասարկող անձնակազմի, ուղեբեռի ու բեռի նկատմամբ պատասխանատվության ապահովագրության նվազագույն ապահովագրական ծածկույթը համապատասխանեցվում է այն փոփոխություններին, որոնք ընդունվել են Եվրոպական միության ու Քաղաքացիական ավիացիայի միջազգային կազմակերպության կողմից 2024 թվականին: Նախաձեռնությամբ սահմանվում են պատասխանատվության միջոցները, կատարման ապահովման հիմքերը, ինչպես նաեւ վեճերի լուծման կարգը:

Նախաձեռնությունը քննարկվել է Տնտեսական հարցերի մշտական հանձնաժողովի նիստում եւ ստացել դրական եզրակացություն:

Երկրորդ ընթերցմամբ քննարկվել են «Առեւտրաարդյունաբերական պալատների մասին», «Պետական տուրքի մասին» եւ կից օրենքներում նախատեսվող փոփոխությունները:

Օրենսդրական փաթեթի ընդունումը միտված է ապրանքների ծագման հավաստագրերի տրամադրման եւ փորձաքննության անցկացման կարգի պարզեցմանը, հստակեցմանը, կանոնակարգմանը եւ կատարելագործմանը, ինչպես նաեւ փորձաքննություն իրականացնող մարմիններին ներկայացվող պահանջների ու փորձագետների որակավորման եւ քննության անցկացման կարգի սահմանմանը:

ՀՀ էկոնոմիկայի նախարար Գեւորգ Պապոյանի խոսքով առաջին ընթերցմամբ ընդունվելուց հետո փաթեթում կատարվել են տեխնիկական բնույթի փոփոխություններ:

Օրենքն ուժի մեջ կմտնի 2027 թվականի հունվարի 1-ից:

Մինչեւ երկու ամիս ժամկետով հետաձգվել են ««Գնահատման գործունեության մասին» օրենքում փոփոխություններ եւ լրացումներ կատարելու մասին» եւ ««Պետական տուրքի մասին» օրենքում լրացում կատարելու մասին» օրինագծերի փաթեթի ու ««Հարկային ծառայության մասին» օրենքում փոփոխություններ եւ լրացումներ կատարելու մասին» եւ կից օրինագծերի փաթեթի քննարկումը: