18.03.2026 | 19:22
Իրանը սպառնում է Կատարի, Սաուդյան Արաբիայի և ԱՄԷ-ի էներգետիկ ակտիվներին՝ իր գազի հանքավայրի վրա հարձակումից հետո
Ախուրյանցի կնոջ խափանման միջոցը փոխվել է տնային կալանքով․ նրան վերագրվում է Փաշինյանի հասցեին բռնության կոչ պարունակող գրառում
Հասարակություն
18.03.2026 | 18:25
Ախուրյանի բնակչուհու կալանքը փոխարինվել է երկամսյա տնային կալանքով։ Այս մասին Factor.am-ի հետ զրույցում ասաց նրա փաստաբան Արտակ Մովսիսյանը։
Հիշեցնենք՝ մեկ ամիս առաջ հայտնի դարձավ, որ «Մեր ձևով» շարժման համակիր, 55-ամյա ախուրյանցի մի կնոջ մեղադրանք են առաջադրել և մեկ ամսով կալանավորել վարչապետ Նիկոլ Փաշինյանի հասցեին գրառում կատարելու համար։
Կնոջ փաստաբանի պնդմամբ՝ խոսքը ոչ թե հրապարակային գրառման, այլ մասնավոր նամակագրության սքրինշոթի մասին է, որը, սակայն, իր վստահորդը չի տարածել։
«Գրառումը, որը հիմք է հանդիսացել քրեական վարույթ նախաձեռնելու և քրեական հետապնդում հարուցելու, հանդիսանում է մասնավոր զրույց՝ մեկ օգտատիրոջ կողմից մյուս օգտատիրոջն ուղարկված հաղորդագրություն: Նամակագրություն, որը հրապարակային բնույթ չի կրել, բայց դա վարույթն իրականացնող մարմնի կողմից դիտվել է որպես հրապարակային խոսք, հետևաբար՝ նաև հրապարակային կոչ»,- ավելի վաղ հայտարարել էր փաստաբան Արտակ Մովսիսյանը։
Արտակ Մովսիսյանի խոսքով՝ իր վստահորդն ավելի վաղ դիմել է Դատախազություն, հետո նաև Ոստիկանություն, որ իր անվամբ կեղծ էջ է բացվել, և կոնկրետ անձ փորձում է իրեն վնասել: Օրեր առաջ Ախուրյանի ոստիկանություն է գնացել՝ ճշտելու, թե ինչ գործողություններ են ձեռնարկել, նրան հենց այդ ժամանակ էլ ձերբակալել են:
