Քաղաքապետարանը խորհուրդ էր տվել վարձակալել, թաղապետարանը մերժել է. բնակիչ․ ՏԵՍԱՆՅՈՒԹ

Երևանի քաղաքապետի որոշմամբ ապամոնտաժվում են Աջափնյակ վարչական շրջանի Նորաշեն 26 հասցեի ավտոտնակները։

Քաղաքացին, որի ավտոտնակն ապամոնտաժվում էր, Factor TV-ի հետ զրույցում ասաց, որ նախորդ օրը քաղաքապետարանի ներկայացուցիչները եկել են տարածք և տեղեկացրել, որ անհրաժեշտ է շտապ հավաքել ավտոտնակում գտնվող իրերը, քանի որ հաջորդ օրը՝ այսինքն այսօր, այն պետք է ապամոնտաժվի։

Նրա խոսքով՝ ավտոտնակը սեփականության վկայական չունի, սակայն 2021 թվականին քաղաքապետարանը խորհուրդ էր տվել դիմել սեփականության գրանցման համար։ Արդյունքում կատարվել են գեոդեզիական աշխատանքներ, կառույցը գրանցվել է կադաստրում, իսկ դրանից հետո տարիներ շարունակ վճարվել է գույքահարկ։

«2021 թվականին մեզ խորհուրդ էին տվել դիմել սեփականության համար, գեոդեզիա ենք արել, կադաստրում գրանցվել է շինությունը, և դրանից հետո տարիներ շարունակ գույքահարկ ենք վճարել՝ բանկով, պաշտոնական ձևով»,- ասաց բնակիչը։

Քաղաքացու խոսքով՝ այն ժամանակ հողատարածքն ունեցել է բնակելի նշանակություն, սակայն հետագայում դրա կարգավիճակը փոխվել է և դարձել ընդհանուր օգտագործման տարածք։

Նա նաև նշում է, որ քաղաքապետարանից առաջարկել էին փորձել վարձակալել հողատարածքը, սակայն թաղապետարանը հրաժարվել է այն վարձակալության հանձնել։

«Ասել են, որ ընդհանրապես հնարավոր չէ նման տարածքները վարձակալության տալ»,- վստահեցրերց քաղաքացին։

Հիշեցնենք՝ Երևանի քաղաքապետ Տիգրան Ավինյանը փետրվարի 9-ին երևանցիներին առաջարկել էր վարչական շրջանի հետ հողի վարձակալության պայմանագիր կնքել գործող ավտոտնակի համար և շահագործել այդ տրամաբանությամբ։

«Խոսքը չի վերաբերում այն ավտոտնակներին, որոնք ոչ մի տեղ և ոչ մեկին չեն խանգարում, խաղահրապարակի փոխարեն չեն, բայց նաև մենք ուղղակիորեն այլընտրանք չենք ունենում, քանի որ եթե մենք ստանում ենք ինքնակամ շինության օրինականացման հայտ, ստիպված ենք լինում և՛ մերժել, և՛ ստիպված պետք է լինենք հետո մերժման դեպքում քանդել»,- նշել էր Ավինյանը։

Մանրամասները՝ տեսանյութում։

Արփի Հակոբյան