15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Ինչ գործով են հարցաքննվել Գերագույն հոգևոր խորհրդի աշխարհիկ 4 անդամները. մանրամասներ
Հասարակություն
12.03.2026 | 18:01
Գերագույն հոգևոր խորհրդի աշխարհիկ 4 անդամներ այսօր վկայի կարգավիճակով հրավիրվել և հարցաքննվել են Քննչական կոմիտեում։ Factor TV-ի տեղեկություններով՝ Վահան Տեր-Ղևոնդյանը, Գևորգ Դանիելյանը, Շահեն Կարամանուկյանը և Միքայել Մալխասյանը հարցաքննվել են Գարեգին Բ ամենայն Հայոց կաթողիկոսին առնչվող քրեական վարույթի շրջանակներում։
Հիշեցնենք՝ փետրվարի 14-ին, հայտնի դարձավ, որ կաթողիկոսի նկատմամբ քրեական հետապնդում է հարուցվել կարգալույծ հռչակված Արման Սարոյանի (Գևորգ եպիսկոպոս Սարոյան) հետ կապված դատական ակտի կատարումը խոչընդոտելու մեղադրանքով։ Գարեգին Բ-ի և մի շարք բարձրաստիճան հոգևորականների նկատմամբ խափանման միջոց ընտրվեց բացակայելու արգելքը, ինչի պատճառով Ավստրիայում երկու օր անց կայանալիք եպիսկոպոսաց ժողովին նրանք չկարողացան մեկնել. ժողովը դարձավ եպիսկոպոսաց հավաք, իսկ կաթողիկոսն ու մյուսները մասնակցեցին հեռավար։
Ըստ ամենայնի՝ այսօրվա հարցաքննությունը այս վարույթի շրջանակում է։ Երկու անձի հարցաքննությանը մասնակցած Ռուբեն Մելիքյանը վստահ է, որ հենց այսօր Խորհրդի աշխարհիկ անդամներին հարցաքննության հրավիրելը միտում ունի՝ հաշվի առնելով այն հանգամանքը, որ հենց այդ նույն ժամին պետք է կայանար Գերագույն հոգևոր խորհրդի նիստը։
«Շատ հետաքրքիր զուգադիպությամբ այսօր հրավիրվել է վկայի կարգավիճակով հարցաքննության այն նույն ժամին, երբ որ պետք է ընթանար Գերագույն հոգևոր խորհրդի նիստը։ Ըստ էության՝ սա նույնպես եղել է միջամտություն Գերագույն հոգևոր խորհրդի, այսինքն՝ Մայր Եկեղեցու ներքին գործերին։ Անուղղակի միջամտություն, իհարկե, բայց այնուամենայնիվ միջամտություն։ Որևէ հրատապություն ես չեմ պատկերացնում, և չեմ կարծում, որ որևէ մեկը պատկերացնի»,- նշում է փաստաբանը։
FactorTV-ն փորձեց պաշտոնական պարզաբանում ստանալ Քննչական կոմիտեից, սակայն ի պատասխան մեր հարցմանը նշեցին՝ չեն մեկնաբանում։
Ռոզա Վարդանյան
