25.06.2026 | 23:51
Արմեն Մելիքբեկյանը մտադիր չէ առաջադրվել ՀՖՖ նախագահի ընտրություններում
Առողջապահության նախարարը հաղորդման ընթացքում քննադատել էր Միքայել Մինասյանին. Պետրոս Ղազարյանի արձագանքը՝ «Կենտրոնից» իր հեռացման մասին լուրերին
15.11.2018 | 11:21
Թեև մեկ շաբաթ առաջ «Կենտրոն» հեռուստաընկերության «Ուրվագիծ» հաղորդաշարի հեղինակ, լրագրող Պետրոս Ղազարյանը հաստատել է՝ իր Հանրային հեռուստաընկերություն տեղափոխվելու լուրը, այդուհանդերձ այսօր մամուլում հրապարակում եղավ այն մասին, որ «Կենտրոն» հեռուստաընկերության սեփականատեր, ԲՀԿ առաջնորդ Գագիկ Ծառուկյանը Պետրոս Ղազարյանին ազատել է աշխատանքից:
Պատճառն, ըստ մամուլի, օրերս առողջապահության նախարար Արսեն Թորոսյանի հետ ունեցած հարցազրույցն է: Factor.am-ը փորձեց պարզաբանում ստանալ լրագրողից, որը կտրուկ հերքեց այդ տեղեկությունը՝ նշելով, որ այդ լուրը գրելու պատճառն այն է, որ առողջապահության նախարար Արսեն Թորոսյանը հաղորդման ընթացքում խոսել է Միքայել Մինասյանի մասին:
«Արսեն Թորոսյանը, երբ ինձ հյուր էր եկել, որոշ մարդկանց քննադատեց, հիմա ի պատասխան դրան այսպիսի բաներ են գրում»,- նշեց Պետրոս Ղազարյանը:
Հիշեցնենք՝ շուրջ 17 տարի «Կենտրոն» հեռուստաընկերությունում աշխատած Պետրոս Ղազարյանի հեռուստաընկերությունից դուրս գալու և Հանրային հեռուստաընկերություն տեղափոխվելու լուրը մոտ մեկ շաբաթ առաջ հաստատել է Հանրայինի գործադիր տնօրեն Մարգարիտա Գրիգորյանը: Պետրոս Ղազարյանը Հ1-ում վարելու է «Այսօր իրականում» հաղորդումը, որի անոնսն արդեն տեղադրված է հեռուստաընկերության պաշտոնական կայքում:
